Joe Jonas leh Sophie Turner te inthen boruak chuan reh lam aiin sosan lam a pan a, an chanchin hian titi a luah rih dawn a nih hmel hle. 'Game of Thrones' star Sophie Turner hian Ningani khan New York City-ah petition a theh lut a, Jonas chu an fate England-a hruai haw phal sak turin a ngen nia tarlan a ni. 

Jonas leh Turner te hian New York-ah inbiakna an nei a, mahse an thu a inhmu meuh lo nia sawi a ni. English actress Turner hian US atangin England pana an fate pahnih hawpui a duh a, mahse American singer Jonas hian passport a pe duh lo a ni awm e. 

Jonas kutah zawk hian an fate hi an awm rih a, hei hi Turner chuan lak let tumin a bei mek. Turner hi film series pakhatah a chang a, tun thla hian England-ah kir a duh tawh. Mahse Jonas chuan harsatna a siam sak a, an fate hawpui hi a remti lo nia tarlan a ni.  

Kum li an inneih hnuah Jonas chuan September 5 khan Turner nena inthen dilna hi a theh lut a, chin fel mai erawh a harsa dawn hle niin a lang. Sophie Turner leh Jonas te hian fanu pahnih an nei a, a u zawk Willa hi kum thum mi a ni a, a nau zawk phei chu kum khat leh thla hnih mi chauh a la ni.