An hla phuah awmkhawmna, zaithiam hrang hrangin an sakna album chu puitlin tur chuan an nghak rei tawh ngat ngat hle. Nikum hmasa atang khan an lo buaipui tawh kha a ni a. Kuminah a hlawhtlinna kan hmu dawn chauh a ang hle... An bei rei ta ngar ngar khawp mai. Mahse, thil tha hi chu a nghah lam han peih phawt mai ila a inchhirawm loh nge nge an tih thin kha maw! Nikum hmasa atanga an lo buaipui tawh — John Mawitea leh Mapuii Fanai te nupa chuan an music video collection album tur chu hla pakhat chiahin an tihchhuah lohna a dal tawh niin an sawi. An album thar tur hi July thla turah chuan kan ngaihthlak hman ngei tawh hmel. John Mawitea leh Mapuii fanai te nupa music video collection album thar turah hian Mami Varte, SP-i, Dj-i, Rebecca Lallawmsangi te, Muanawmi Chhakchhuak, Mimi Lalzamliani leh Youh Icon MS-i, Pantei leh Zorinzuali Khiangte, Mizo Idol star Zualbawihi leh Feli Fanai, F. Laldinmawii te bakah gospel singer pahnih — Hlutei leh Zoramchhani te pawh an tel. Mahse, Hlutei leh RC-i te erawh hi chuan lengzem hla an ni loin, pakhatin inneih hla a sa dawn a, pakhat zawkin ram ngaih hla a sa ve thung ang. Hmeichhe zaithiam 14 zet karah mipa pahnih an inrawlh ve zauh a. Hun rei tak atanga a zai lai hmel kan hmuh tawh loh, phai lama zaia ei a zawn avanga Mizorama a hmel kan hmuh khat tawh tak — Henry Thanzauva leh Famkima te an ni. He album hi a variety vet vet hmel khawp mai. Music genre hrang hrang — dubster, country, leikapui, contemporary jazz tih vel te a ni nawk ang.