Aizawl: Home Minister Lalchamliana hova Coordination Committee on Traffic Management ruahmanna siam angin June, 2019 atangin Aizawl khawpui ah lirthei tlan dan thar hman a ni dawn.
Ruahmanna tharah chuan lirthei number tawpa 1&2 te Thawhtanni ah an ding ang a, number 3&4-te Thawhlehniah, 5&6-te Nilainiah, 7&8-te Ninganiah dingin 9&0-te Zirtawpniah an ding ang a. Inrinni leh Pathianniah chuan lirthei engpawh tlanchhuah theih a ni ang. Lirthei intlanchhawk hian zing dar 9 atanga tlai dar 6 inkar a huam ang a, hei hi enchhinna atana tih a niin a that chuan hman zui zel tum a ni.
Tuna intlanchhawk kalpui mek hi October 2, 2017 atanga kalpui tan niin hei hian Pathianni tih loh ni dang zawngah zing dar 8:30 atanga tlai dar 6 thleng intlanchhawk hi kalpui niin lirthei number tawp ber zel chu calendar ni nen a inrual hunah an ding thin a. Hei hian district dang leh state pawna register, Private motor, Aizawla awm leh tlan lut turte pawh a huam a, mipui hman bik (public service) taxi, maxi cab leh phalna nei bikte chu a huam lo a ni.
Thudawnnain a tarlan danin Aizawl khawpuiah lirthei 123,235 a awm mek a, tuna intlanchhawk kalpui mek (number tawp leh ni inrual)-ah chuan ni tin lirthei 12,000 vel an tlan lo/ding thin a, tuna ruahmanna tharah hi chuan ni tin lirthei 24,000 vel ding tura ngaih a ni a, hei hian traffic tawt lutuk a tihziaawm ngei beisei a ni.
Home Minister hova meeting-ah hian night parking leh garage endikna kalpui chungchangte, department hrang hrang hmalakna avanga kawng laihte awmze nei zawka kalpui te, Aizawl khawpui huam chhunga Parking area ennawn te, chak zawka Pollution control endikte bakah Aizawl khaw chhunga lirthei chet velna a awlsam zawk nan a hmalak dan tur hrang hrang sawiho a ni bawk.
&&&&&&&&&