Junille-i chu ka nau a ni; ti ila, a mihring mihrinnaah inzawmna phei chu kan nei law. Mahse, kan inpawh êm êm mai. A ‘engkim’ ka hre ve-in ka inhria a; a duh—a duh loh ka hriatpui ve vek. Mahse, inngaizâwng erawh kan ni lo nasâ!

Junille—Thianghlimi!
Junille-i chu ka nau ka ti nâ a, ka thiannu nih a fàwm a. Inngainâa inkâwm ngeih êm êm mai kan ni. Tin, amah ngaihzâwngtu tam takte pawh min hrilh keuh keuh thin. Duh tak a la thlang lêm lo—a hmu lo chu a ni hauh lo!

Amah ‘chuk’ duhtu te; amah iai lotu te; nupuia sàwm mai duhtute pawh a hmu fur mai; mahse, a hnial fithla hmak hmak zêl—a khirh e—Junillie-i hi chu!

Kei pawn ka hau thin—ngaihzâwng nei ve êm êm tawh thin tûrin. Heti êm êma hmeltha si hian. ‘Aw le,’ chu a ti ve thin. Mahse, a ‘Aw le’-ho chuan ‘tih’ an tum zêl a! India rama HIV Positive rank-ah No 1 kan nih a hria a—a hnampuite a hlau tlat nia!

Invêng Junille-i
Ngaihzâwngte chu a’n nei ve rèn râwn a. Duat pawh an induat vè thin. ‘Nih’ pawh an ni rei—chû a bialpâ, a nihpui nên chuan. Mahse, a hnute khawihsak a tum zêl a; chu chu a la ‘okay’ thei a. Chutia an khawihsaka a’n thâwk hiam hiam chuan, chu pâ chuan a kap zen a tum thin! Junille-i chuan a tithei ta thin si lo a!

Mi chuan ‘invêng over’ an ti ang chu! Mahse, over thatna lam a panah ka ngai thung—kei chuan! Kan rapper-ho anga ‘kap dance’ làm ang kha ni ve tawh hek lo—kap inkhawihsak kha a ni tawh a—case a tling thei tlat tawh … tih chu ka nau Junille-i hian a hria…pawh a ni lo, a hre ve thlâwt a ni! A invêng ve tawp mai a nih chu.

In kiss-case te, hnute inkhawihsak case te hi chu nula tlangvâl inngaizâwng case-ah a ngai thei mai; mahse, kap inkhawihsawihsak case hi chu, Junille-i hi chuan a ngai thei thai bîk lo!

HIV +ve tam chhan
MA-ah Economics a là a; Statistics-in a chhunzawm a. A Desertation-ah ‘Kan ram HIV Positive’ chungchâng a khurbingpui a—râpthlâk a ti! Kan thalaite hi ‘zir chian tlâk’ rêngah a ngai lo hial… lek lek! India rama kan top-na a’n thlîr vang vang hian a subject thlâk leh mai te a rilrûk lek lek thin—Juvenille-i hian.

A chhan a’n chhui chiang a—Kohhran thalaia inhmang zînga sex hluar ber kan nihna hian a rilru a tinâ a tin ni! ‘Nawhchizuar chu an rêm tawh e,’ a ti. ‘A mi nâwlpui hian kan vei tam tâ,’ a ti. (Finfiah duh tân MSACS Report a en theih reng e. Hei hi chu actualfiction base mai a ni e. – ZSK)

Tha tê têa awm a, Kohhran thalaia inhmangte kan him lohna ber chu HIV Positive a ni ta hi runthlâk a ti ta êm êm a! “Eng vâng nge?” ka ti a. Tlang takin min hrilh a: Ani chuan, “Kan inpàwlkhâwmna piah lama a fála kan inpàwl thin vâng a ni mai!

Phat rual a ni lo! Thisen test data pawh ka nei—chhawp chhuah vek a tûl lo. Test lo pawh …” a ti! A va rapthlâk êm!

Junille-i ve chu
Ani chu a invawng hrâm hrâm a; rual pâwl chungin mí pàwl a duh lo a! Pathian huat ber (?) mipat-hmeichhiat (sex) a la thutak riau! “Inngaihzàwn avânga sex hman kher tûr tih hi, ‘Zu in loh tûr’ tih bur nên thu lai kan la dùn tlat em?” min ti!

“Nang? I fihlîm em … sex-ah? Mihring mit hmuhah ‘pâwng’ loin i sual mai thei; chu chu Pathian mit hmuhah a fair bîk em?” min ti. Ka zäm dèr!

“Condom fak chiam chiam hi ngai ka ti lo—sex hman loh inzirtir hi a him zâwk! I tih loh mai hian i him fê! ‘Ti lo thei lo tân chuan…’ an ti nâ a,’ tih loh theih loh hi inzirtir zâwk mai tûr. Bus hnunga tàrte hian a la ti ve lo, Middle school zirlaite tih kan châktir mai mai zâwk! I tár malék ang u! A awmzia an hre vek tawh! A hman dân hre chin leh la hre kher lo hian i inzirtir mai ang u,” a ti leh.

A ni ngawt mai, ka nau sawi khi: India rama topper kan nihna pakhat, Cancer bâkah, kan HIV+ve him nân hian nu leh pa kan pawimawh a, media kan pawimawh êm êm bawk. ‘Chhas nei suh,’ tih chu kan inzirtir thei lo pawh a ni thei e; mahse, Pathian huat êm êm, zu in ai pawha a huat zâwk, ‘Sex hmang suh,’ tih hi chu, kan la inzirtir theih ka ring tlat.

Junille-i chuan, “Ka hmangaih emaw ka lo tih laka ‘vawi khat ka lo dawhsual’ zauh kha, a pawi ta a ni,” a ti asin!