Bangalore-a First Pro Am khelh zawh taka 85Kg Category champion Ngurlianzuala Sailo chu a khelh that avangin Chennai-a Septemper 26-28, 2014 chhunga K-1 Asian Championship Muay Thai khelh turah India aiawha khel tura thlan a ni. He intihsiakna lo awm turah hian Ngurlianzuala Sailo hi Mizo tling awmchhun a ni a, tuna championship a khelh that mai bakah hian selection pawh vawi-thum a paltlang tawh a, medical lamah pawh a tling tawk a, he championship khel tur hian thlan a ni ta a ni. He tournament a khelh zawh hian Bangalore lamah training a chhunzawm dawn a, hetah hian Samuel Lalrozama Hmar leh Hemat Kumar, Instructor ten trai-ning hi an lo neihpui ang. Ngurlianzuala hian India chhimlam khawpuia training a neih zawh hian December-ah Muay Thai Preoffessional League khel turin Thailand a pan leh nghal ang. Chaltlang Lily Veng tlangval Ngurlianzuala hi tunah hian India No.1 niin champion lai a ni a, Thailand lama a kalna tur pawh hi Extreme Muay Thai Academy Pvt. Ltd. Bangalore chuan an tum sak vek dawn a, Chennai-a K-1 Asian Championship Muay Thai a khelh hma hian Extreme Muay Thai Academy, Bangalore-ah hian training a nei dawn a, September 11, 2014 hian Aizawl a chuahsan ang. Mizoram State Mixed Martial Art Association chuan an member-in hetiang dinhmun a thleng thei hi an lawm hle a, a thawhna Mizoram Police 3rd Bn. MAP lama an hotu ten hunawl tha tak an siam sak thin avangin lawmthu an sawi a, Mizoram Police Contact Sport Association ten cheng sing hnih an pek avangin an chungah Ngurlianzuala Sailo hian lawmthu a sawi bawk. Ngurlianzuala hian World Championship-ah Silver medal lo la tawhin India ram chhung inelnaah hian Gold - 2, Silver - 2 leh Bronze -1 a la tawh a ni.