Aizawl May 9, 2023 : Mizoram Rajya Sabha MP K.Vanlalvena chuan vawiin khan Prime Minister Narendra Modi hnenah memorandum thehlut a, Manipura thil thlengte chhuitu tur Christian MP te telna Joint Parliamentary Team din tura ngenna a thlen.

K. Vena chuan May ni 2 ,2023 atanga tun thlengin Manipur-ah Christian biak in 42 aia tlem lo tih chhiat a nih tawh thu leh heng zingah hian Tribal Christian te biak in chauh tihchhiat a nih loh thu leh Meitei Christian biak in pawh 6 lai tihchhiat a nih thu Prime Minister hi a hriattir. Manipur buaina hi meitei leh tlangmi te intihbuaina ringawt a ni lo tih hei hian a tifiah hle a. Manipur atanga Christiante umchhuah tum an awm tih a hriat chian a, hei hi India constitution lungphum pawimawh pakhat sawinghinna a nih thu Vena chuan Prime Minister hi a hrilh bawk a ni.

May ni 5, 2023 zanah Assam Rifles duty ten Churachandpur ah Civil mi pawisawi lo hmeichhe 3 leh mipa 1 an kahhlum thu Vena chuan Prime Minister hnenah a thlen bawk a. Heng thil tha lo titu chhuichhuaha hrem annih theih na turin Christian MP te telna Joint Parliamentary  team din turin Prime Minister Narendra Modia hnenah ngenna a thehlut a ni.