Ka chawl tawh dawn, thangthar tha zawkte ka kian ang’ - Lal Thanhawla

Admin - Nov 14, 2021

A banna an pawm ngei tura a ziah tur thu a sawi

Aizawl; Mizoram Pradesh Congress Committee (MPCC) President ni mek leh Chief minister tum 5 lo ni tawh, Lal Thanhawla chuan chawlh a tum tawh tih ZALEN hrilhin, an party ah amah aia fel leh tha zawk an tam thu a sawi.

ZALEN-in a kawmna ah MPCC president chuan tuna hruaitu term kal mek, (2019-2022) bak president nih a tum tawh lo tih a sawi a, kum 2023 a MLA inthlanpui neih turah pawh candidate nih a tum tawh loh thu a sawi. "Ka chawl tawh dawn a, thangthar zawkte ka kian tawh ang. Kan party ah hian kei aia fel leh tha zawk an tam em em a ni," a ti. Hawla chuan a banna hi central lamah a thehluh a ngaih tur thu a sawi a, a banna hi an pawm ngei tura a ziah tur thu a sawi bawk.

Hruaitu thar chungchangah an party in buaina an tawh a rin loh thu sawi bawkin, an party kalphungah Vice president a piang an president ang tih a awm lo nia sawiin, ZPM leader ni mek Lalduhoma chu amah thlak a MPCC president ni tur ang dawn dawna thulengvak awm thin chungchang chu 'a teuh lo mai...' tiin ZALEN zawhna a chhang. Lal Thanhawla chuan MPCC chu state dang anga AICC in an hruaitu an ruat sak ang an nih ve loh thu pawh a sawi a, rorelna hrang nei an nih avangin central lam atangin hruaitu an rawn ruat ve ngai loh thu a sawi.

MNF sawrkar kal mek a hmuh dan sawiin, ram pumpui huap chhenfakawm thiltih lian tham la nei lo an nih thu leh mi pangngai, ram hmangaihtu tan chuan thlan chi an ni tawh lo nia a ngaih thu a sawi. "Anmahni hmui atangin Covid do kawnga ti tha ber zingah an inpuang a, central sawrkar atangin ti tha ber in ni e an rawn tih kan hre lo" ti bawkin, tunhnai a Chief secretary ruat a nih dan chu zahthlak a tih thu te, Aizawl a kawng chhawng siam tur pawh a nghahhlelhawm thu leh tlumtea thlir a an thlir thu a sawi.

NLUP leh SEDP chungchang pawh sawiin, "Cheng nuai 1 theuhin kan pe ang kan ti a, central sawrkar nen inberemin kan ti mai a, dikna, taimakna leh rinawmna nen a dawngte chuan an hlawhtlinpui a...chhungkaw tin hnenah, NLUP lo dawng tawh te hnenah pawh SEDP cheng nuai 3 zelin kan sem ang an ti a, a nghakhlel pawl ka nih ka ring, kum 3 chhunga an tih theih loh hi kum 2 chhungin an ti thei angem ka hre lo," MPCC president chuan a ti bawk.

Tunhnai a Chief minister Zoramthanga thubuai chungchang thutlukna a a ngaihdan sawiin, chargesheet en chuan dawt a awm loh thu leh jail tan ngeina tur a nih thu a sawi.

Share now