Aizawl May 20, 2023 : Hachhek bialtu MLA Lalrindika Ralte chuan Opposition bialtu ni chung leh chhuan tlak leh chapopui tham hna thawh a harsat laia a chunga rinna nghata amah an la ring tawk tih a hriatin hachhel Bial mipui te chungah lawmthu a sawi.

Hachhek bialtu MLA Lalrindika Ralte chuan a bial chhung Hachhek South Block - Darlak, Mualthuam, Thaidawr, W. Bunghmun leh Tumpanglui-ah te MNF leh BJP atangin mi thar 43 a lawm luh naah thu sawii, "Kum 4 chuang bialtu MLA ka nihna angin kan lo inhrawn tawh a. Ka mizia te, MLA fund hmanga ka hnathawhte hi a hre chiangtu in ni. Mi famkim ka ni lo chung leh min hriat chian tawh hnua Congress Party-a lawmluh tur kan han nei thei zel hi lawmawm ka ti takzet a. Opposition MLA kan ni a, chhuan tlak leh chapo pui tham hna thawh a harsa. Chuti chunga ka chunga rinna nghata min la ring tawk tih ka hriat hian Hachhek Bial mipuite chungah ka lawm tak zet a ni," a ti.

Lalrindika Ralte chuan, "Party-ah kan inhmanna la rei lo mah se, kan hriat phak tawkah Congress Party chuan a thutiam a tihlawhtling lo ngai lo. Kan ti ang an tih chu an ti mai zel. Pathian leh mipuite zara Congress Party kan sawrkar a nih chuan, mi harsa zawk, dinhmun hnuaihnung zawkte chhanchhuahna turin Ṭang Puihna cheng nuai 2, a tul chuan a aia tam pawh kan pe dawn. Ṭang Puihna hi NLUP anga chhungkaw tin hnena sem dur dur tur a ni lo. Nasa taka hnathawk, thahnemngai si, ding chhuak thei lo an awm. Chung mite dinhmun tha zawka an awm theihna tura Ṭang Puihna hi ruahman a ni," a ti.

Hachhek bialtu MLA chuan kan ram dinhmun chhiat zia sawiin, "Sawrkar hnathawkte pawhin a hun takah hlawh an la thei lo va, tual thihna a tam em em a, dan pawisak lohna a lianin eirute an zalen em em a. Hetiang zela kan ram hi a kal a nih chuan chhanchhuah thlak loh khawpin kan ram hi a awm thei a ni. Kan ram siamṭha tur hian theihna kan nei a, chu chu duham loh hi a ni. Sawrkar pawisa hi mipui pawisa, mipui ta a ni a. 'In khaw kawng kan siam sak ang che u ang a, kan party ah rawn lut rawh u,' titute hian mipui hmangaihna an nei lo tih lo hre reng rawh u. Congress Sawrkar laiin hetianga sawrkar sum hmanga mipui vau behna leh campaign-na a awm ve ngai lo," a ti bawk.