Ka Huang (March 10, 2019)
En zawh pawha en leh tul thin mi U,” tih ang maiin ziak tawh mah ila, ziak leh tulin ka hre tlat. Chhiar lo pawh in awm ve chek ang.
Kum 1948 khan thla 4 atan chauh Census Supervisor-ah sorkarin min appoint ve a, ka bial chu hmar lamah Tipaimukh, chhim lamah Farkawn bul, Tiau kama Thaidawr an tih khi a ni. Census Opereator (khawchhiar) 6 hna ka supervise a ni.
Thaidawr khua chu (la awm tak maw) Tiau lui atanga mel khat emaw lek a ni a. Pawih (Hrendum) khua a ni. Ka kal lai kha chuan lal (chief) an la bân loh avangin an lal chu Sangviala a ni. Lusei in khat chauh a awm a, chutah chuan ka thleng a. Tlangval ve ta lem chuan lal nula (nuthlawi) chu ka zuk chhun rim e ka tia, a hming chu Salmani a ni. Tiau nghaleng dawipuiah min sawm phut mai a, kei lah chuan a awmzia pawh hre si lo. A tih dan min hrilh ta a.
“Nang chuan ipte leh chem chauh i keng a, keiin sangha manna tur bawm ka keng ang a, chawchhun tur pawh keiman ka rawn keng vek ang. Kan haw hunah nangin i duh chuan min paw hawng ang a, ka pa a lawm dan athuin ran chu a tlu mai ang. A lo berah Vawk chu NGEI NGEI a ni,” a ti phut mai sia. Kei lah tlangvalah pawh hmeichhe lama DAWIHZEP ka lo ni bawk nen, a sawi lai pawh chuan, nula puitling Tiau atanga han puak hawn chu a ngaihna awmin ka ring lo a. “Nang nula puitling, engtin nge Tiau atanga in in thlenga ka puak zawh tehlul ang che,” ka’n tia… ani lah chuan, “A hming mai alawm, lui tui kan dai laiin min han pua ang a, vaukam hnim kan thlen veleh min nghat mai ang a, kan kal chho dun ang a, kan kawmchhakah min paw bahlat leh ang a, kan kawngkaah min paw chungin, ‘Ka pu, hei i fanu ka rawn paw hawng a nia, kawng min hawn rawh,’ i ti ang a, a rawn hawn ang chia, min paw lut ang a, chhuat laiah min nghat mai ang. Ran talh lam chu ka pa thu thu a ni mai a, a lawm viau chuan Sial, chuti em a nih loh pawhin Vawk chu matheilo a ni hrim hrim,” a ti a. Min sawm nasa khawp mai a, kei lah awmhmunah ka zak chem chem ringawt mai bawk si. “Hmanah ka U pawh hi an rawn paw hawng a, ka pa hian Sial a talh mai asin. Haw i kal ang,” min ti sek sek mai a; mahse, ka TLAWM ta a nih kha!
Hei tun, kum 70 liam hnu hian, ka la hre kur mai si a, tun thleng mai hian ka ngaihtuah a, Salmani thu ka hnial ta kha ka inchhirin BAN mai pawh a chen lo… hlam tam tak a daih ta a nih hi.
Kha mi tuma ka tlawm kha tun thleng hian ka INCHHIR a nih hi.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024