Aizawl January 13, 2023 : ZPM political session - hmathar lakna leh infuih tharna inkhawm chu vawiin khan neih a ni a, He hunah hian party President Lalliansawta chuan kalphung thar nena sawrkarna chelh ve se tih duhna a lian zel a ti a, ram leh ZPM tana thil hlawhchhuak thei turin inthurual leh hlim tlang taka kalphung thar siam tum turin kalkhawm te a chah.

Lalliansawta chuan, “Mizoram boruak kan hre vek a, ZPM boruak a tha chho viau zel a, mi te thinlung a inhawng zel a ni. Sawrkarna la chelh ngai lo mi thar ten, kalphung thar nen sawrkarna chelh ve se tih duhna a lian zel; mahse hei vang ringawta ngaihthat a hun lo. Kan grassroot-te tang thei tura puih zel a pawimawh a, kan hna hi a la tam khawp mai, kan tan mar pat a ngai. Kan kal zelna atan rilru puitling tak pu ila, pa chan chang takin, kan ram leh ZPM tana thil tha hlawhchhuak thei turin inthurual tak, hlim tlang takin kalphung thar sawrkar siam i tum ang u,” a ti.

ZPM political session-ah hian Working President K Sapdanga leh General Secretary B Lalchhanzova ten hmalak thar dan tur report pein party worker-te zirtirna leh fuihna thu an sawi bawk. K Sapdanga, Campaign Committee Chairman ni bawk chuan hmalak dan sawiin, “Party dang zawng zawng aiin ZPM hi a thawkrim a, kalphung thar mipui sawrkar din a tum tak tak a ni tih hi keimahni leh ram mipuiten an pawm thlap tur a ni, ” a ti.

B Lalchhanzova chuan Campaign Committe report a pe a, “Party rethei kan ni a, chutihrualin sum hi kan hmachhuan ber a ni lo a, theihtawp kan chuah ang a, kan campaign-na tura kan mamawh khawp erawh chu Pathianin min ngaihtuahsak ngei ka ring,” a ti bawk.