Aizawl, June 6, 2022 :  Aizawl West III bialtu, VL Zaithanzama, MLA chuan,  ‘’Tuna kan ram dinhmunah chuan kut hnathawktuten sawrkarah an harsatna an thlen thin a, kalphung tharah erawh sawrkarin kut hnathawktute harsatna a zawt ang a, a sutkiansak thin zawk ang,’’ a ti.

ZPM chhung inkhawmah VL Zaithanzama chuan, ‘’Champhai leh Hnahlanah te sawrkarin Grape a chin tir a, hun leh tha tam tak sengin a hlawkna an tel chho ve dawn chauh tihah an tharchhuah te a man sak hlauh zawk hi a pawi takzet. Kuthnathawktuten hmangaihtu an mamawh takzet a ni. Party tinin kuthnathawktute kan inhmangaihsiak a, inthlan dawna kan thupui leh au hla  ber a ni vek thin. Amaherawh chu a taka hmangaihtu an mamawh a, chu chu ZPM policy-ah awm sa a, sawrkar hma atangin theihtawp a chhuah nghal a ni. Ei tur min petu leh ngaihtuahsaktute hian tha taka hna an thawh theih nan Pathian hnenah hriselna kan dilpui ang a, a takin an tan kan che chhuak bawk tur a ni,’’ a ti.

Zama chuan, ‘’Central service-a tling pha Mizoten kan nei hlei thei ta lo hi a pawi a, a chhan mawhpuh tur pawh kan dap nasa hle. Tun lai hian Aizawl West III huamchhunga zirna in hrang hrangte ka tlawh kual mek a, kan thalai leh naupangte hian lehkhathiam an tlin a, hnam dang el phak turin thiamna leh finna an kawl tih a chiang hlein ka hria.  Kan Education System hian a zir a ngai a ni,’’ a ti bawk.