Aizawl May 6, 2024 : ZPM General Headquarter chuan vawiin khan Office-ah chhung inkhawm hun an hmang a, he huna thusawitu Agriculture Minister PC Vanlalruata chuan, “Kalphung thar avangin ram mipui an hlim a, he sawrkar hnuaiah hian sawrkar hnathawkte pawh mipuite tana biak nuam leh an thawhchhan ang ngeia mipui tan thahnemngai leh zuala thawk turin ka duh a ni,” a ti.

PC Vanlalruata chuan, “Kan Chief Minister hian Chief Minister tha bik a nih zia a lantir mek a, a intiam ang ngeiin works department a enkawl lova, chutihlaiin Finance erawh a enkawl. Budget la pharh ve ngai lovin kan pharh ve ta a, leiba ngah tak chunga bul tan kan nih zia hretu kan ni chungin Health Care bill ba cheng vaibelchhe 65 pek a ni a, eng chhit man vaibelchhe 83 chuang pek a ni bawk. Hma thar lak tur tam tak chhawp mek a ni a, thla 4 chhung leka he sawrkar chetna avangin ram mipui an hlim a, an lung a muang a ni," a ti.

Agriculture Minister chuan, "Thlai thar 4 - Sawhthing, Hmarcha, Aieng leh Hmunphiah te kan lei dawn kan ti a, kan intiam ang ngeiin kan lei dawn. A bikin sawhthing chin tum an tam a, a chi ringawt pawh lei tur tunah hian a vang tawh a ni. Lo ching ula, kan lei ngei ang tih kuthnathawktute kan chah nawn a, lo taima chhunzawm zel rawh u. Society hmangin kan ram kan din thar dawn a, kum tam lo hlawhchhampui tawh a nih avangin a din dan turah pawh uluk takin ruahmanna kan kalpui mek a ni. Buh leh bala intodelhna tura ruahmanna kan siamah kalphung thar mipui sawrkar hian eptu bial kan thliar dawn lova, kan zavai huap a nih dawn avangin taima apiang an hlawhtling mai dawn a ni,” a ti.

Ruata chuan, “ Theihtawp leh dik thei ang bera kal kan tum mek karah nasa taka beih kan tawk tho a, politics-ah chuan hetiang hi thil kalphung a ni. Lalpa malsawm ram rim nam din kan tum a, “Ka eiru lovang” ti a bul tantute kan nih angin dik takin kan kal mek a, contract leh supply-ah percent chan ve kan tum lo. Vawiinah hian mipuite avanga MLA leh Minister ni thei kan ni a, ZPM party tana hah taka thawktute pawh an zahawm hle a ni. Dan hnuaiah, dik tak chunga induhsak theihna a awm a nih chuan kan induhsak ang tih ka sawi duh a, hei hi kalphung dik lo a ni lo. Mahse duham lo ila, eiru lo bawk ila, sem sem dam dam ei bil thi thi tih hi kan thupui nise tih hi ka duh ber a ni,” a ti bawk.