Nikum kum tawp lam atangin natna chi khat Corona virus (Covid-19) an tih chu China aram atanga intanin khawvel ram engemaw zatah a leng a. He hri hi a hlauhawm a, fimkhur tur a niin inven lawk a pawimawh a. Chutih lai chuan kan fimkhur phawt chuan he natna lakah hian kan fihlim thei a ni tih kan hriat a pawimawh a, a invenna tur leh fimkhurna tur hrang hrang pawh mithiam ten an sawi hnem ta hle. Chutih lai chuan he natna kan hriat dan leh kan dawnsawn danah mipuite kan chiang tawk lo hle niin a lang a, kan chiai ta lutuk nia lang hi a pawi hle.

Sawrkar thuneitu leh mithiam ten he natna inkaichhawn dan te, kan fimkhurna tur leh kan tih tur leh tih loh turte an puang nasa hle a. Chutih lai chuan social media lamah te kan hriat dan lo sawi ve chiam mai leh leh thu diklo vawrhdarh a tam thin hi a pawi hle a ni. Hei hian mipui a ti chiai a, thil tul lo ah kan ralkhelin mipui kan tibuai thin tih hriat a, sim a tha hle. Tunhnai maiah pawh he hri vei an hmu nia sawi te, artui leh arsa ei a him lo nia thu thehdarh te hi a pawi tak zet a ni.

Covid-19 hi mihring te thehdarh a ni tih hria in sawrkar chuan mipui punkhawmn ang chi nei tlem turin mipuite a ngen a. Sawrkar ngenna zawmin pawl leh kohhran hrang hrang te chuan khawmpui leh hmachhawp an neih te an thulh (Cancel) te hi a lawmawm a. Hei mai bakah sawrkarin Mizoram luhna tur hmun a siam bakah YMA leh khawtlang te duty insiama sawrkar hmalakna an tawiawm zel te hi a lawmawm tak zet a. Hetia kan tanrualna hian rah tha a chhuah ngei a rinawm a, Covid natna hi kan dang thei em a nih loh pawhin a ziaawm phah ngei a beiseiawm a ni.

Sawrkarin he hri hlauhawm takina Mizoram a luh lohnan ruahmanna siamin lirthei lut leh chhuak pawh endik vek nise tia a rel te chu mi thenkhat ten hresualin 'phai lam atanga lirthei lut dan a ni dawn' tiin nitin mamawh an chhekkhawl ta vak mai a. Hei hian nitin mamawh chi hrang hrang buhfai, dal, tel leh a dangte a tih van phah a. A awmchhun pawh kan inchuh zo duak duak mai a ni. Hetianga thu diklo vawrhdarhtu hrang hrang leh tunhnaia thil vang denchhena mahni bungraw zawrh tito tu te hi mipui ten kan dem ngam a ngai a, sawrkar pawh hian an phu tawk hremna a pek ngei a tha.