Aizawl January 13, 2023: Mizo Hnam Run chhung inkhawmah Horticulture Develpment Board Vice Chairman Prof. F. Lalnunmawia. MLA chuan, "Kan CM-in Delhi tlanga a lo zuk vuak dup tawhte kha tunah chuan a hmin ta. Hun harsa tak karah kan sawrkar hmalaknaah lawmna tur tam tak a awm," a ti. 

Prof. Mawitea MLA chuan, "Opposition leh mi thenkhatten, kan CM zahawm tak tawngkam 'vuakdup' tih hi fiamthu thawh nan te an hmang a. Kan CM zahawm takin kan sawrkar tirh lama Delhi tlanga a lo zu vuakdup tawhte chu Covid-19 hrileng avangin khawtlai deuh mah se, tunah chuan a hlawhtlinna kan hmu chho tan mek a, fiamthu thawh nana hmangtute pawh tunah chuan an heh a hil tan ta. Mizoram hmasawnna tur cheng vaibelchhe tam tak senna tur project-te pawm a lo ni ta a, chung zingah chuan Aizawl khawthlang lam leh hmar lama by-pass road te, Bamboo link road Pilot Project-te, Mizoram leh Manipur inkalpawhna leh Hmar tlangdung atanga Bagha pawhna tur kawngpui te, Sustainable Aizawl Transport Project te bakah Central Special Assistance (SASCI) sum Rs Nuai 39412 hmanga hmasawnna ruhrel lian tham engemaw zat siam tura hmalak mek a ni, Zoram hmun hrang hrangah hmasawnna hmel thar kan hmu chho zut dawn a ni. District hrang hrangah Football ground phullem phah hawn tawh niin engemaw zat siam mek a ni," a ti.

Aizawl S-lll MLA chuan, "Tunlai khawvelah Media hmanga inbeihna a nasa hle a,  thudik a ni em tih pawh hriat mang loha sawrkar beihna a tam hle a ni. Puhchhiatna nasa tak hi sawrkarna siamtute chanvo a ni fo thin a. Mi thenkhatten MNF sawrkar hnathawh tha tam takte sawi duh lovin, rem leh rem lovin sawrkar leh ram hruaitute puhchhiatna tur hlir an zawng a. Mi pangngai chinte erawh chuan heng sawiselnate hi ngaihdan tawk an nei vek a ni," a ti.

MNF Adviser chuan, kumin kumtawp inthlanah Pathian leh mipui zarah kan sorkar leh ngei dawn a. Eptu lamten hmasawnna hi helh hle mah se, an tih ve tur rengah ngai ila. Sawisel leh puhchhiatna hi chu sawrkarna siamtute chanvo ve renga ngaih theih a ni a. Balhla pawh a rah that poh leh do nasat a ngai thin ang hian, chak taka hmala mek sawrkar hian do leh sel a tawk zel ang. Heng puhchhiatna karah hian MNF mipuite nghet takin i ding zel ang u," a ti.

Horticulture Develpment Board Vice Chairman chuan,"Kan sawrkar hian hun harsa tak karah kum 4 kan lo hmang zo ta a. Covid-19 hri leng leh sum harsatna karah inkalpawhna kawngpui siam leh cheithat te, Education, Health leh Sports infrastructure siamahte hmasawnna tam tak kan hmu chho mek a ni. Buhfai leh LPG ah kan hnianghnar hle bawk a, a lawmawm takzet a ni," a ti.