Pathian thuin ‘nuih hun a awm a, tah hun a awm’ a tih ang deuhin mihring nunah hian nuih chang te, hlim chang te, fiamthua han rik hluai chang te pawh a awm ve tur a ni. Englai pawha thu tak run reng mai, Kohhran upa fekfawn ang maia inhmuam up reng mai hi a fuh chiah lo. Mi fiamthuah pawh kan nui ve ang chu maw le. Kan thiam phei chuan mi dangte tihlimtu, fiamthu thawhtuah pawh kan tang ve ang chu. Hetih rual hian englai pawha fiamthu reng mai te, hoh em em reng mai te erawh a fuh chiah lo mai thei.

Pulpit atanga Pathian thu sawi thinten an thusawi karlaka fiamthu thianghlim an han zep zeuh thinte hian mipui rilru nguai tur a chawk tho a, mipuiin an thusawi an bengkhawn phah thin. Hetih rual hian a ti mi lo fefe pawhin an thusawi karlakah fiamthu zeh talh an tum fo thin. Thil tul lo tak a ni. Tum khat pawh revival speaker pakhat hian kan kohhranah crusade a rawn nei a, rem leh rem loin a thusawi karlakah fiamthu zeh tel phet a tum thin a, a fiamthute lah chu ti takin a nuhzatthlak bawk si lo, a ti lutuk deuh a ni. Hit lo zet zeta a fiamthu rawlh tam luat khan a thusawi hmai a timawk a, ngaithlatute beng a tithlep zawk mah a ni. Rev. Vanlalzuata te’n fiamthu tawi te te, nuihpui ham ham tur an zep zeuh thinte nen chuan kar hla tak a ni.

Fiamthute hi a hun leh a hmun azirin a thiam chuan thawh rawh se. Thiam lem lo erawhin thawh ve phet tum loh a tha ang. Zephyr drama club lar hnu hian KTP/TKP Conference-a drama changtu zawng zawngte hian a fiamthu zawng leh a hlimawm zawnga chan vek an tum ta mai. Thil tul lo tak a ni. Mi zawng zawng hi H.Rotluanga anga fiamthu talent nei tha an ni vek lo. H.Rotluanga leh a hote chuan fiamthu hlimawm, nuihpui dur dur tur chang zel rawh se. Chu chu an an drama chan thiam dan ber leh an talent tihpun theih dan ber pawh a ni ang. Anni tihthik ni awm taka a hlimawm zawka drama chan vek kan tum erawh a fuh ber lo.

Lemchan (drama) lungkuai em em, nuihna tur awm lo, zirtir nei tha takte pawh a chan theih tho ang chu maw le. Nuih hluah hluahna tur a awm loh avanga lemchan (drama) hlawhchham a nihna a awm chuang lo. Mizo lemchan thawnthu hmasa ber, ‘Sangi inleng,’ Lalthangfala Sailo ziahte pawh hi lemchan thawnthu lungkuai a ni a, a karlakah nuihna tur a awm lo. Chutih rualin chhiartute lairil erawh a fan em em lawi si. A thuhrimah khawvel huap pawha lemchan thawnthu tha leh larte hi a hlimawm lam ni lo, lungchhiatthlak (tragedy) lam rawng kaia phuah leh chan a ni deuh vek mai.

Mizote hi hnam tlem kan ni a, kan inpawh bawk a, hei vang hi ni maw, fiamthua inbawl leh insawisak pawh kan uar viau mai. Fiamthu duh tak hnam chu kan ni hrim mai. Thian inngamtlak tak tak, “Ek-a” tia inko ta maite hi an awm nawk a nia. Mi hlim thei nih te, fiamthu duh nih te, fiam dawl nih te hi a tha e. Chutih rualin englai pawha uan reng mai leh fiamthu reng mai te, hoh em em reng mai erawh a tha ber lo.

Ziak leh chhiar thiam tamna state kan ni a, hetih rual hian thalai lehkha thiam zingah ngat pawh ram hnuk thil pawimawh sawihoa titi nana hmang thin erawh an tam lo viau mai thei. Thianhoa inhmuh khawm tawh chuan hoh em em tur emaw hi kan ti deuh tlat zel. Lehkha thiam rau rauah Mizo thalaite tluka ram hnuk thil pawimawh ngaihven lo, national politics vir vel ngaihven lo leh hre lo hi India ramah an tam lo viau mai thei. Ram hnuk khawih thil hi kan thengthawngah a lut lutuk lo. Lehkhathiam zingah ngat pawh Assembly budget session ngaihven peih, annual budget chik peih hi an tam lo viau mai thei.

Kan thil chik peih loh lutuk vang te, kan hoh lutuk vang te, ram hnuk khawih thil pawimawh kan vei loh lutuk avang te hian kan ram politic lei durah hian politics khelh dan chhe mi kuitiahin a awm mek a, mi pamhamten a par an tlan zel mai niin a a lang.

Ram pumina reality show pakhat ve mai kan ngaihven luai luai mai te, khawthlang tawp Vairengte atanga Vaphai thleng maia fiamthu inang kan nuih pui hum hum zel mai hi kan thanmawh bawk a ni. Fiamthu thawhtute hian thawh zel rawh se, reality show buaipuitute pawhin buaipui zel rawh se. Chutih rualin a hnam puma nuih hluah hluah reng mai te, hoh em em reng mai te, hmasawnna lam hawi ni lo thil thuhmun buaipui a, kan thlek zawng a inang thup thup mai thin erawh kan sim a tha khawp mai.