Aizawl November 14, 2022 : Vawiin ZPM chhung inkhawma thusawitu ZPM Legislature Party Deputy Leader Vanlalhlana, MLA, chuan, “Hmasawnna hna ti thuanawptu kan huat ber tur chu eirukna a ni,” tiin, Mizoram Chief Minister lo ni tawh te dinhmun leh Chief Minister ni thei dinhmuna ding te a hmuh dan a sawi bawk.

Vanlalhlana chuan, “Hman ni lawka Thingsulthliaha YMA inkhawmpui khan kan hriat angin nasa lehzuala eirukna do an pass a nih kha, Presbytery inkhawmpuiah pawh thurel pawimawh tak a ni a, heng hi Kristian state tan chuan thil duhawm a ni vak lo. Kan ram dinhmun enin Pu Rokunga’n ‘Thamna leh bawlhlawhna ten tual an leng a pawi ngei e’ a tih ang kha kan ni zo ta ni berin a lang. Eirukna do turin Lok Ayukta kan nei a, a chhuifiahtu tur investigating officer erawh kan nei lo a, chak taka hna thawh theih a ni lo,” a ti a. “Sawrkar hnathawk zawng zawng an eiru lo a, mi fel tak tak an tam mai. Chief Minister thusawi, IV grade paper hawn leh nuai za tel eiruk a in ang lo a, sazu mei hi tan bun theih a ni a, eirukna hi reh bun theih a ni. Kawng chhia, eng chhia, sikul building chhia, sawrkar hnathawk leh pension hlawh lak theih loh te hi eirukna vang a ni,” a ti bawk.

ZPM Legislature Party Deputy Leader chuan Chief Minister ni tawhte chungchang sawiin, “Pu Ch. Chhunga eiruk thu tuman an sawi lo; a huaisen zia, a rilru that zia, a dik zia, a nun tlawm zia leh rambuaia laia hruaitu nih a tlin zia an sawi thin a ni. Brig Thenphunga Sailo eiruk thu pawh tuman an sawi lo; mi rinawm, mi huaisen, mipuite thlamuantu a nih thu an sawi a, Chief Minister Office a chhuahsanin invawmluhna tur in a nei lo. Pu Laldenga kha Chief Minister a ni rei lo; a eirukna sawi hriat a ni lo a, in tha tak erawh a nei hman hram a ni. Pu Lalthanhawla hi Chief Minister ni rei ber a ni; ramchhunga a eirukna kan hriatloh laiin sap chanchinbuah a chhuak uai uai a, PIL thehluh a ni a, a hming a hliau a ni. Pu Zoramthang hi CM ni rei ber dawttu a ni ta; a hun tir lamah chuan zopa, mi inngaitlawm tak, Pathian tih mi niin kan hria a. Hun a lokal zel a, tuna kan hriat dan erawh a dang ta; a sum lakluh leh thil neih inmil lo case a nei a, a hming a chhe ta hle a ni,” a ti a. 

Chief Minister ni thei tur te chungchang sawiin Hlana chuan, “A chang chuan, khawiahnge dikna hi a awm tih a awl ta a ni. Chuvangin, kan hmabak chu kum 2023-ah Chief Minister candidate pathum an awm dawn niin a lang a; Pu Lalduhoma, Pu Lalsawta leh Pu Zoramthanga te an ni. Pu Zoramthanga chanchin kan hria, kan la duh em? Pu Lalsawta hi a eirukna hriat tur a awm lo, tunlai bawm lar tak tahtu a ni; amah tha viau mah se, a bawma a khungkhawm tur te han en hian hotute aia hotu, bawma khungkhawm harsa tak tur te an ni a, mipuite ngaih a ngam lo a ni. Pu Hawla chu Central Congress Working Committee member a ni a, state Congress chunga awm a ni. Pu Hawla zuna uai Pu Sawta ngaina lemlo te an chawl zel bawk si a, Central leh State Congress chhungkua enin beisei tur awmin a lang lo,” a ti bawk.

Pu Hlana chuan “Pu Lalduhoma hi MZP ten eiru lo bera an thlan a ni a, Zo-talk zawhna pawh ‘Ka pian tirh atanga ka thih thlengin ka eiru lovang’ ti ngam a ni. ZPM tawngtai retreat kan neih khan Rev. Dr. K Thanzauva’n kochhuakin zawhna a zawt a, Pu Duha chuan VUC uapna leh party puihnain eiru lo tur leh eirukna do turin a intiam a nih kha. Eirukloh ringawt pawh hi ram tana hna ropui tak thawk kan ni.” a ti a. “Kei pawhin ka ngaihtuah reng thin; eng dinhmunah pawh ding ila ka eiru lovang tih ka intiam a, thu ka sawina apiangah ka sawi ta zel a, vawiin hi vawi 17 ka sawina a ni a, insawi bat pawh ka duh a ni. Kan party lakah mipui thikthu a chhia a, Congress leh MNF ang turin min beisei lo, min beisei dan a danglam a, danglam ngamin hma i sawn zel ang u,” a ti bawk.