Aizawl: East Tuipui bialtu MLA Ramthanmawia chuan, "Burma a kan unau Zohnahthlak te nena kan in unauna hi tute emaw sawi bo theih a ni lo a ni," a ti.

Nimin khan Dawrpui Multipurpose Hall-ah Chin TV huaihawtin tunhnaia Myanmar raltlan te Mizoram sawrkar leh mipui ten an lo dawnsawn dana lawmthu sawina hun hman a ni a. 

He huna thu sawitu East Tuipui bialtu MLA Ramthanmawia chuan Burma ah mipui sawrkar a din leh a beisei tlat tih a sawi a. Mizo mipuiten harsatna an tawh laiin Myanmar mipui ten duat takin an lo enkawl awh thin tih sawiin, "Mizoram buai vangin Mizo tam tak Burma ah an chho a, heng mite hi duat takin an lo enkawl tawh thin a. Tunah Burma lama kan unau ten harsatna an tawk ve leh a, hetiang huna tanpui theia kan awm hi a lawmawm hle a ni," a ti. 

Burma raltlan te tan Chief Minister Zoramthanga'n theihtawp a chhuah tih sawiin central thuneitu ten raltlan te thawnkir tura an ti chungin a duh lo tih sawiin Ramthanmawia chuan, "Covid-19 hmachhawn tur leh raltlan buaipui tur hian Chief Minister Zoramthanga hi a tha ber a. Heng hmachhawn tur hian Pathian in hriak a thih a, CM Zoramthanga tluk tur hi an awm lo a ni," a ti bawk.

Inkhawma thu sawitu dang Chin State Chief Minister Salai Lian Luai chuan, "Covid-19 hripui avanga kan buai em em laia Mizoram sawrkar, kohhran, tlawmngai pawl leh Mizo mipui ten kan harsatna hriaa min buaipui tawhna zawng zawngah lawmthu ka sawi a ni," a ti a. Burma buaina chu a la reh mai dawn lo tih sawiin, "Kan buaina hi thla 2/1 a reh mai chi a ni lo a, chuvangin Mizo mipuite pawh min ning mai lo a, a tawp thlenga min tanpui turin ka duh che u a ni," a ti a. Raltlan zingah khawtlang tana hnawksak an awm thei tih sawiin ngaithiam a, Pathian hminga lo dawh hram hram turin a ngen tih a sawi bawk.

Chin TV hian raltlan buaipui kawnga an thawh that avangin Chief Minister office, Central YMA, MJA, MZP, ZORO, MRRCM te hnenah lawmthu sawina thilpek an hlan a ni