Ram buai lai khan nun a ral ti em em a, sipai an in luling a, zanah pawn chhuah an phal lo a, duh hun huna inkhawm theih pawh a ni lo. Zan tin mai kha curfew a ni reng mai a ni. Curfew an han hlip zeuh a, inkhawm an phal mial tum chuan inkhawm ngai lo pui pui pawh Biak in lam panin an tlan dawr dawr mai a ni an ti. Raltitna hian Pathian min hnaih tir a, derthawng riaua inhriatna hian kan nun a khalh ngil a, inngaihtlawmna puan min sin tir thin.

Lal Davida ang khan kan nunna der thawn zia te, thihna nena kan inkar hi pen khat lek a nih zia te (I Samuela 20:3), chaw vawi khat lemsual lekah pawh kan hringnun zin khawng zawh tawp mai thei kan nih zia te hi hrechiang i la, kan chapo phar phar lo mai thei a ni. Lal Hezekia ang khan, ‘Zawitein ka kal dem dem tawh ang’ kan ti chuai raih mai ang. Hezekia pawh a thih tur thu Pathian zawlneiin a han hrilh phut mai chu bang lam hawiin a inlet thawk a, tap zawih zawihin Pathian hnenah a tawngtai nghal mawlh mawlh mai a ni. Pathianin a chungah zahngaihna a lan tir a, a nunna chu kum 15 atan a pawhsei sak leh ta a ni.

Thalai tam takin rual kan el ta lo lutuk te, tum mumal kan nei lo lutuk te, hmalam hun helhkamna kan nei lo lutuk te hi eng vang nge ni ang le? Kan nun a nawm tak vang hi a ni ngei ang. Ei leh barah a hnam angin intodelh lo mah i la, Silchar kawng a tlang that a, ram chhungah buaina lian tham a thlen lem loh chuan Vai ho zarah kan thla a muang ve tum hrang bawk si. Nitin nuna harsatna kan tawh loh avang hian kan thla a muang a, kan khauphar thawven a, kan nun kan uluk lo a, a tawpah tisa leh thlarau pachhiatnain min nang leh fo thin.

Nuam sa takin lehkha kan zir a, ni tin class kal nana lirthei hawlchhuak thei kan tam em em a, mobile phone changkang ber ber kan hum fir fer a, he nun nawmna hian min hmet zawi a, rualelna kan tlachham a, thiamna leh finna kawnga hnam dang te el turin kan tha a thum zo ta a nih hi.

Kan nu leh pa te hun lai khan lehkha zir chak ngawih ngawih, harsatna vanga zir thei ta lo, nih tur ang ni zo ta lo tam tak an awm a sin. Unau rual zingah lehkha zir thei awmchhun chu a unau ten hlo thawh an awl a, harsa takin an chawm rawn a, mahni buhfai inphurhin hla te khuaah lehkha an zir hram hram thin. Chutiang a nih avang chuan an mawhphurna pawh an hre chiang a, dawngdah taka lehkha zir a thiang lo a ni. Nasa taka zir a, hlawhtling ngei tura beih kha an nu leh pa, u leh nau te laka an bat tlaknaah a ngai hmiah mai. Kha vang kha ni maw, harsa taka lehkha zir kan mi hmasa te zingah Central Service leh All India Service a inziak tling pawh an tam thin reng ni. Tunah erawh heng service ah te hian mizo te kan kang chat ti tih ta. Rual u te thachhang dawl tur kan awm ta mang lo. Nuam sa taka lehkha zir, lehkha zir loh pawha thil dang engmah ti peih chuang lo, College kal chu hun khawhralna ang leka ngai kan tam ta a ni mahna.

Thalaite rilru sukthlek chu eng pawh lo ni se, nu leh pa te pawh hian kan zir lo ve bawk a ni mai thei. ‘Kan fate nawmsak loh hlauin kan thawk’ kan ti a, a dik reng mai. Chutih rualin mamawh an sawi hlek apiang awlsam takin kan tih sak zung zung a, hei hian an rilruah dawngdahna a thlen ve bawk a ni. Chi te, chini te, tel te hi a burah hian a lo awm mai bik lo a, pawisaa lei a ngai a, chu pawisa chu thawhchhuah a ngai a lawm maw le. Kan fate hian cheng sangkhat hi tlem an ti a, cheng za thawhchhuah har zia an hre si lo. Kan mamawh eng thil mah hi a thawna lo awm mai leh mit dawivaih hmanga dawi chhuah mai theih a ni lo tih te, thawh chhuah ngai vek a ni tih te hi hria se a tha khawp mai.

Tlangval pakhat hi a pain lehkha zirin phaiah a dah a, thla tin a indaih zan tur pawisa a thawn thin a ni. Tum khat chu chu tlangval chuan nupui a ru ta mai a, chu thu chu a pain a lo hriat chuan ti hian lehkha a thawn ta a, ‘Ka fapa, i tlangval lai leh thawhchhuah i neih hma chuan i pa ka nih angin chawm che hi ka bat a ni a. Tunah chuan tlangval dinhmun kalsanin pa nih i lo thlang ta a, nupui i nei tih ka lo hriatin ka lawmpui a che. Tun atang chuan pa leh pa chu kan in chawm thei tawh lo ang” tiin lehkha a thawn ta a. Chu tlangvalin a pa lehkha a lo hmuh chuan engmah a sawi lo. Ngawi rengin a nupui ruk thar chu a dah let leh tawp mai a ni an ti.

Thalai te, tuna nu leh pa zara nuamsa tak hun hmang mek te hian nakinah an mahni kea an din hun a la thleng dawn a ni tih hria se, hmabak eng tak an neih theih nan remchanna hi lei thiam se a tha ngawt mai. Chu chu kan hnam dinchhuah nana thil pawimawh tak pawh a ni bawk ang.