ZALEN August 24, 2023 : MNF Thalai Vice President Zodinpuia chuan, "Mizo Thalaite'n hmasawn tuma nasa taka hna kan thawh lai hian, kan damkhaw chhuahna tura pawimawh hmasa ber 'Mizo Nationalism' kan tlansan ang tih a hlauhawm hle a, thil dang aiin kan ram leh hnam, kan sakhaw himna hi kan dah pawimawh hmasa ber tur a ni", a ti.

Mizo National Youth Front (MNYF) Headquarters, rorelna sang Extended meeting chu August 24, 2023 (Ningani) hian MNF Thalai room, 'Mizo Hnam Run' ah neih a ni a, hun kaihruaitu Zodinpuia chuan, "Tunlai hian pawl leh ram rawngbawlna kawnga mi rinawm lo te'n Mizo mipuite hnenah rinawmna neih a Tulzia uar takin an tlângaupui mêk a, Mizote chu kan pi leh pu hun lai atang tawha hnam huaisen leh rinawm kan ni a, MNF chuan rinawmna hi kan vawng reng tur a ni. Kohhran mipuite pawhin mahni awmna Kohhrana rinawm lote chu sakhaw rawngbawltu atân kan duh lo a, hetiang chiah hian politics ah pawh mi rinawm lote chu ram kaihruai turin mipuite'n kan la hnualsuat zel a ni," a ti bawk.

MNF Thalai Vice President chuan, "Tunlai hian thawmhnaw man to leh changkang tak tak inbel chunga Mizoram retheih leh pachhiatzia nasa taka tlangaupui thin an awm a, heng mite khawsak zia leh an thusawi chu a inmil lo hle a ni. Mizoram chhiatna thiam taka sawi Thinte hi kan ramin a mamawh an ni lo a, heng mite ai hian veng tina YMA Branch hruaitute'n Mizoram tan hna an thawk nasa zawk hle," a ti.

Zodinpuia chuan Mizoram tan MNF chuan theihtawp a chhuah zel dawn tih sawiin, kalphung thar tlângaupuitute beidawnga an tawp hunah pawh MNF chu Mizoram leh Zofate te tân nghet takin a la kal zel dawn a ni, a ti.

Vawiina MNF Thalai hruaitu kalkhawm chuan, 'Kum 2023 Mizoram inthlanpui lo awm turah MNF-in rorelna a chan leh ngei theih nân theihtawp chhuah ni se', an ti a. Kumin 2023 September thla aTangin Mizoram pumhuapa Mizo Nationalism campaign beihpui  kalpui turin ruahmanna a siam a ni.

MNF Thalai Headquarters rorelna sâng, Extended meeting vawiina neih chuan resolution pathum(3) a pass bawk a ni.

1. Zofate inpumkhatna tur leh Tanpui an ngaih hunah pawh huaisen taka kan unaute hmaa ding Thin Chief Minister Pu Zoramthanga leh a kaihhruai MNF-in Mizoram ah sorkarna a chan leh ngei theih nân theihtawp kan chhuah dawn a ni.

2. Kan ram leh hnam himna tibuai thei tur zawnga sorkar laipui hmalakna hrang hrangte MNF sorkar-in huaisen taka a dodal Thin hi lawmawm kan ti a. Hei hian MNF chu Mizoram himna lungphum pawimawh ber a nihzia a tarlang a ni.

3. Forest Conservation (Amendment) Act, 2023 dodalna Resolution, huaisen taka Mizoram Assembly House ah pass a ni hi lawmawm kan ti a. Mizoram hmasawnna leh a himna tura thawk turin MNF aia Tha an awm lo, tih a rawn lang chiang chho zel hi lawmawm kan ti.