Zirtawpni kalta tlai khan Chief Minister Lal Thanhawla chuan Sairang-a Environment & Forests Nursery Centre-ah ramngaw, nungcha leh boruak pawimawhna inzirtirna leh inhrilhhriatna hmun, ‘Interpretation Centre’ a hawng. Hawnna thu a sawiah Chief Minister chuan boruak tha hip tur leh sik leh sa mihringte mamawh tawk kan neih theihna tur kawnga thil pawimawh tam takte hi Mizote hian kan la hre tawk lo viau a, kan ramngaw neih ang chhun te, lui leh ram leilung kan enkawl danah te zir tur kan ngah hle a ni a ti a. He centre hi chutiang zir chhuah tur kan neihte dahkhawmna a ni a ti a. Mizoramin sik leh sa tha tak kan neih hi tangkai taka kan hman theih nan inzirtirna hmun tangkai tak a ni dawn a ni a ti bawk. Chief Minister Lal Thanhawla chuan chuan kan ram neih ang chhun chhunte hi a renchem zawnga kan hman a tul thu sawiin, ram hmasawnna tura project lian tak tak bun nan ram awl tha kan la mamawh dawn chauh a, chuvangin kut tling lova sum lakluh tum lova neitu rilru pua thawktu kan nih a ngai a ni a ti. Environment & Forest Minister Pu Lalrinmawia Ralte chuan ramngaw leh lui te hi mipuite ta, mipuite tan vek anih avangin, mitinin kan tangkaipui theihna turin Forest department hian a humhalh hna a kengkawh a, hei hi mi tam takin an hrethiam thin lo a. Chuvangin hetiang lam hrethiamlote hnena hrilhfiahna hmun ‘interpretation centre’ hi kan neih makmawh a ni a ti. Ramngaw, ram awl, lui leh a chhung leh pawna nungchate hi mipuite tan Forest department hian a humhalh a ni tiin, ‘wildlife sanctuary’-ah te chuan ‘Nature Interpretation Centre’ hi siam thin a ni a ti bawk. Bialtu MLA Pu K.Sangthuama pawhin a bial chhunga sorkarin hmasawnna hna a thawh reng reng chu a tawiawm tlat tur thu a sawi a bawk. Hawnna inkhawm hi Pu Lalram Thanga, IFS, PCCF & Principal Secretary in a kaihruai a ni.