ZALEN August 28, 2023 : Vawiin khan Dr.Lallianchhunga MPCC Thupuangtu (Spokesperson) leh Chairman, Media Deptt chuan Pathian leh mipuite zarah sawrkarna an chang anih chuan 'Kan tih ang' an tih te an tihlawhtling dawn a ti a, chu chu party dang te laka Congress party danglamna niin a sawi.

Champhai South bial chhunga Zion Veng, New Champhai leh Tlangsam khuaa Congress party Unit tlawhchhuahna hun a hman naah Dr.Lallianchhunga chuan, “Party dangte aia Congress party danglamna chu policy rintlak kan nei thin hi a ni. Tang Puihna hnuaiah din chhuah tuma tan latute puihna tur cheng vaibelchhe tam tak budget-ah kan dah dawn a. Kuthnathawktute fairel bel thleng phak tur ‘Tang Puihna’ policy hi kan tihlawhtling ngei dawn a ni. Dinchhuah tuma tan la duh thalaite tan pawh ‘Tang Puihna’ hnuaiah ruahmanna siam a ni a. Zirlai lehkhathiam thei si, mahse sum harsatna tawk te tan pawh ‘Tang Puihna’ hmangin sawrkarin tanpuina pek a tum bawk. Congress party-in ‘kan ti ang’ kan tih chu Pathian leh mipuite zarah ti theia kan awm phawt chuan kan tihlawhtling thin a, hei hi party dang te laka Congress party danglamna a ni,” a ti.

Dr.Lallianchhunga chuan ramri a insumdawn tawnna chungchang sawiin, “Congress party sorkar loh chhung rei lo teah Myanmar nena kan insumdawn tawnna kawngah harsat a thleng nasa hle a. COVID-19 a zia-awm hnuah pawh Mizoram lam Gate chauh hi engvangin nge khar reng a la nih? Manipurah chuan Moreh-a insumdawn tawnna ramri Gate an hawng tawh a. Tualvungi Ko Thiam an awm lo em ni? Congress party chuan a ngaihna kan hria, Dan lalna ram sorkar kan siam dawn a, dan hnuaiah kan huaisen hle ang. Border Gate Duty, Assam Rifle te biak thiam ringawt a tawk lo, sorkar laipui au thiam kan mamawh a ni. Nakum Lok Sabha inthlanah Congress party kaihhruai I.N.D.I.A hian BJP paihthlain sawrkarna a siam ngei dawn a, mipui ngaihdan lakna hrang hranga opinion poll tinah I.N.D.I.A a chak zel. Mizoramah pawh ‘Tualvungi Ko Thiam Congress party’ kan sorkar tir a ngai a ni,” a ti bawk.