Sharad Pawar-a’n Congress hruaitute kawma ‘eptute tanrualna’ an sawiho hnu lawkah a kaihhruai, Nationalist Congress Party (NCP) chuan thla thara Karnataka assembly inthlan lo awm tur chu an chuh ve mai thei.

BJP, Congress leh Janata Dal United (JDU) ten kil thum atangin May 10 inthlan tur hi an chuh dawn emaw tih laiin NCP hian bial 40-45 vel an chuh ve dawn nia sawi rik mek a ni.

NCP hian an chuh ve dawn a nih chuan eptute tanrual tuma beihna a nghawng ngei nia rin a ni a, inthlan an chuh ve tur hi NCP-in national party an nihna an hloh nghawng ni bawka ngaih a ni.

“National party status hi neih leh ngei kan duh a ni,” tiin NCP hruaitu, Praful Patel chuan a sawi tawh.

NCP hian Karnataka inthlan hi an chuh ve dawn a nih chuan Election Commission chuan symbol atan alarm clock a hmantir dawn.

An chuhna lai tur hi Maharashtra-Karnataka inrina lai, Marathi an tamna lai nia sawi a ni a, Maharashtra Ekikaran Samiti an thawhpui mai thei nia sawi a ni bawk.

NCP hian an chuh ve tak tak a nih chuan an thawhpui nghet tak, Congress-in tlin theihna remchang an neih chu a su kiang thei dawna ngaihna a awm a. Rorel lai, BJP chu eirua puhna leh ninna a tam avangin grand old party dinhmun hi \ha meka ngaih a ni.

Ningani zanah khan Pawar-a hian Congress chief Mallikarjun Kharge leh Rahul Gandhi hmuin NCP chief-in tun hnaia Joint Parliamentary Committee (JPC)-in Adani-Hindenburg buaina chhui tura karnaah eptuten an tangrual tawk lo nia a sawi chungchangte pawh an sawiho.

Hetih mek laia Karnataka inthlana chuh an tum ve leh si hi Congress tan chhiatna ni ngei tura ngaih a ni.

NCP hian tun hnaiah ‘national party’ an nihna hlohvin Goa, Manipur leh Meghalaya-ah erawh ‘state party’ an ni.

National party-te hian ram chhunga inthlan apiangah symbol ngai vek an hmang thei a, star campaigner an nei ngah thei a, campaign nan national broadcaster-a an auhla tihchhuahna hun tam zawk neiin Delhi-ah convention office pek an ni thei bawk.

Trinamool Congress leh CPI pawhin national party status hi an hloh ve bawk a. EC chuan heng party-te hian inthlan lo awm leh zel tura an chet dan azirin dinhmun ngai an luah leh thei tih a sawi.

Candidate chang loten BJP kalsan

Karnataka assembly inthlan tur boruak lian mekah hian an awmna party-a candidate chang loten party dang an zawm mek zel.

BJP-in ticket an pek loh hnua MLA atanga a bân hnu lawkah Mudigere bialtu BJP MLA MP Kumaraswamy chuan Zirtawpni khan JD(S) a zawm.

MLA vawi thum lo ni tawh, Kumaraswamy hian JD(S) hi an legislature party leader leh chief minister hlui, H D Kumaraswamy leh state President C M Ibrahim ten an lawm lut.

Nilaini zana BJP-in an candidate tur mi 23 an puan thar lehah Mudigere bialah hian Deepak Doddaiah an dintir tawh dawn a ni.

Kumaraswamy hian ticket a chan loh chhanah BJP National General Secretary CT Ravi chu a puh.

JD(S) pawh hian Mudigere bialah hian MLA hlui, B B Ningaiah an dintir dawn tih an lo puang tawh a, Kumaraswamy hi khawiah nge a din zui dawn a la chiang lo.

BJP-in an candidate loh hnuah an hruaitu hlun tak, chief minister hlui, Laxman Savadi pawhin Congress a zawm tawh bawk.

Congress chuan ‘hetiang hruaitu ropui lak luh chu an tih tur’ niin an insawi a. Zirtawpni tuk khan state Congress chief DK Shivakumar leh chief minister hlui, Siddaramaiah te nen Bengaluru-ah an inkawm a, a zawm zui a. Inthlanah pawh an dintir zui dawn nia sawi a ni.