Tum sa renga mi beia thahna (target killing) chu Jammu & Kashmir-ah a thleng thar leh a. Inrinni khan Shopian district-ah mi firfiakten Kashmiri Pandit an kap hlum tih an sawi.

Puran Krishan Bhat-a hi Kashmir chhim lam district-a Chowdhary Gund-ah, an chenna in bul maiah kah a ni a, damdawi in panpui nghal ni mah se an thlenpui chuan a thi tawh niin doctor-ten an sawi.

Pawikhawihna thlenna hmun hi tumah tlawh theih lohva khar nghal niin a titute zawn hna thawh nghal mek a ni tih police-in an sawi.

Bhat-a hian fa pahnih, hmeichhia pawl sarih zirlai leh mipa pawl nga zirlai a nei tih a chhungte pakhat chuan a sawi a. “A pawn chhuak ngai lo va, ina tawm mai chi a ni a, a chunga thil thleng hian min barakhaih hle,” a ti.

August 16 khan Kashmiri Pandit pakhat chu mi firfiakten Shopian district-a apple chinna hmunah an kap hlum tawh a, a unaupa pawh a inhliam.

August-a thil thleng hi ‘Kashmir Freedom Fighters’ pawl, Al Badr pawl peng pakhatin an tihah an chhal a. Pandit unau hian Independence Day denchhena ‘Tiranga rally’ nei turin mipui an fuih niin an thuchhuahah an tar lang.

Hemi hnuah hian India hnu chhui pawlin tharum thawhna dang thleng leh thei awma an hriat avangin sorkar pawhin venhimna a tikhuah nghal a ni.