July 23, 2023; Tuna NH dinhmun chu tlan ngamna chi-ah an ngaih loh avangin, he kawngpui zawha ni tina veivak ṭhin, khaw 7-a maxi cab service 60 bawr vel chu naktuk atang hian tiamchin awm loin an ding dawn.

NH zawh hleih theih a nih loh avanga tunlaia harsatna an tawh mek chungchang sawihoin, nimin khan Chhumkhumah Tlabung leh a chhehvel khaw 6 atanga maxicab service pawl aiawhte an inhmukhawm a, tuna kawngpui dinhmun chu tlan luih ngamna chi-ah an ngaih loh avangin an service titawpin naktuk atang hian an ding dawn a ni.

Chhumkhuma maxi cab khalhtu leh neitu mi 60 vel kalkhawmte chuan, Tlabung VC huaihawta tun hnaia NHIDCL Regional Office kawta lungawi lohna lantira pungkhawmte chu an thlawp tih sawiin, kawngpui ṭha an neih theih nan theihtawp chhuah tlan zel ṭha an tih thu an sawi a, harsana tawk loa lirthei an tlan theihna tura contractor-ten kawng an siam that hma chuan tlan chhunzawm loh ni se, tiin lungrual takin an rel a ni.