Aizawl August 18, 2024 : Tlabung Maxi Cab Welfare chuan Lunglei-Tlabung kawng siam mekah lungawina an hmuh loh avangin service lova din chhunzawm zel an tum tih an sawi.

Tlabung Maxi Cab Welfare chuan NHIDCL enkawl National Highway 302 chu tun dinhmunah zawh ngam chi-a an ngaih rih loh avangin Tlabung leh Lunglei inkara maxi cab service-te chu August 13, 2024 (Thawhlehni) atang khan an service titawpin anlo ding tan tawh a, Zirtawpnia an enfiahna atanga kawng dinhmun chu an tlan tan leh dawn em tih thutlukna siamna atan hman tum mah se, lungawina tur an hmuh loh avangin din zui zel an tum ta a ni.

Kawng dinhmun enfiahnaah hian Tlabung Maxi Cab Welfare hruaitute bakah Lunglei thlang lama khaw hrang hranga maxi cab service enkawltute intelkhawmna, Khawthlang Maxi Cab Association hruaitute bakah, NH 302 Welfare Committee hruaitute an tel a. Tlabung mai bakah Lungsen leh Bunghmun tiamin khaw hrang hranga maxi cab-te pawhin naktuk, Thawhtanni atang hian an service titawpa din an tum nia thudawn a ni.