Aizawl August 20, 2024 : MIMA chuan Kolasib District Motor neitute hmalakna chu tha an ti a, kawng siamtha tur hian hmalak thuai ni se tha an tih thu an sawi a, chutihrualin kawng dan avang hian sumdawng tumahin an thilh zawrhte ti to lo turin an ngen a, ti to te puanzar an tum.

August 19, 2024-a Kolasib District lirthei pawl hrang hrang intel khawm ten an ro rel, August 22, 2024 hnu lama tiam chin awm lova lirthei engmah Kolasib district chhunga tlan an rem tih loh tur ṭhu chhuah chuan mipuite a nghawng thei hle turah MIMA chuan a ngai a. Hetianga an tih chhan ber, chak lakna kawng chhe lutuk hi MIMA chuan a veiin July 24, 2024 khan siamtha tura ngenna thuchhuah a lo nei tawh a ni, an ti.

Kolasib District Motor neitute hmalak tumna hi a thain, kawng siamtha tur hian hmalak thuai ni se a duh a. Lirthei pawl hrang hrangte hma lakna kawng siamtha rang tura nawrna hi MIMA chuan thlawp tlat a ni. Motor tlan lohin a nghawng leh tuartu ber turte chu mipuite an ni a. Sawrkar hian rang taka ngaihtuahin hma la thuai se MIMA chuan a duh a. Sawrkar an ngen nghal bawk.

Kawng danin a nghawng tura lang chu nitin mamawh ei leh bar, oil thlengin a ni leh dawn a. He thilah hian sumdawng tumahin an thil zawrhte chheprelh lo tur leh ti to lo turin a ngenin a hriattir a ni. Lo ti to leh chheprelh hriat an nih chuan MIMA in tha a tih angin hma a la ang a. A puang zar dawn a ni.