ZALEN August 23, 2023 : Mamit Truck Owner Association te'n kawngpui chhia siamthat phut leh bailey bridge rinawm tawh loh thawmthat phutna atana ni 21.8.2023, zing 6 atanga tiam chin awm lo Mamit District pumpuia lirthei tlan lo tura kawngpui an dan chungchangah vawiin khan sawrkar aiawh leh Truck neitute chu video conference hmangin an inbia a, inremna an la nei thei lo.

Mamit Truck Owner Association leh PWD hotute chu vawiin khan Mamit DC hriatpuina in an inbia a, PWD lam aiawh EE bakah PWD Secretary K. Lalthawmmawia pawh an bia tih an sawi a, an thil phut hrang hrangah hian inremna an la nei thei lo a, naktuk lam hian inbiak leh an tum a ni. 

Mamit Truck Owner Association te hi Zawlnuam, Zamuang, Dapchhuah leh Mamit khaw bul Chhim leh Hmar (Sericulture Farm & Luangpawl)ah duty post siamin an duty-a khawchhung erawh nundan phung pangngai a kalpui a ni.

Total bandh an neih chhante :

1. Darlak leh Bawngva inkar Terei Lei (bailey bridge) hi motor lian full load-in a zawh theih tura siam.

2. National Highway 44 A Darlak to Tuidam siamthat a nih theih nan.

3. Darlak leh Bawngva inkar Terei luia RCC bridge chak zawka thawh a nih theih nan.

4. National Highway Tuidam Existing Road kms. 105 to kms. 111 ( Tuidam kawng hlui kms. 6 ) hi June leh July 2023 khan siam a ni tawh a, he kawngah hian motor lian kal min phal sak leh turin.

5. Mamit to Bairabi road siamthat a nih theih nan.