20, August : Mamit Truck Owner Association te'n kawngpui chhe lutuk siamthat phut leh bailey bridge rinawm tawh loh thawmthat phutna atana ni 21.8.2023, zing 6 atanga tiam chin awm lo Mamit District pumpuia lirthei tlan lo tura kawngpui bandh an tumna chu All NGO pawhin an thlawp tawh niin ZALEN chuan thu a dawng a, maxicab te pawh an tlan dawn lo a. Hetih lai hian khaw chhung erawh chu nun pangngaiin kal se tiin an rel a ni.

"Mamit district kawngchhia hi kan tawrhna a rei tawh a, bungraw phur hlei thei loin kan awm mek a, kawngpui dan hi kan ti lo thei lo a ni," tiin an hruaitu chuan ZALEN a hrilh a. "Hetih lai hian vawiin ni 20.08.2023 tlai khan kan thukhawm a, All NGO in min thlawp tih kan hre tawh a. Bandh hian khaw chhunga nunphung pangngai huam lo se kan ti a, private lirthei pawh tlan a awm chuan dan kan tum a.Zawlnuam, Zamuang, Dapchhuah leh Mamit khaw bul Chhim leh Hmar (Sericulture Farm & Luangpawl)ah duty post siamin khauh taka duty kan tum," tiin an hruaitu pakhat chuan ZALEN a hrilh bawk.

Tarlan tawh angin truck tlan lo tur hi Maxicab lamin an thlawp tawh bawk a, district chhung leh pawna Mamit maxicab service loh an tum bawk nia thudawn a ni.

Total bandh neih tum chhante :

1. Darlak leh Bawngva inkar Terei Lei (bailey bridge) hi motor lian full load-in a zawh theih tura siam.

2. National Highway 44 A Darlak to Tuidam siamthat a nih theih nan.

3. Darlak leh Bawngva inkar Terei luia RCC bridge chak zawka thawh a nih theih nan.

4. National Highway Tuidam Existing Road kms. 105 to kms. 111 ( Tuidam kawng hlui kms.6 ) hi June leh July 2023 khan siam a ni tawh a, he kawngah hian motor lian kal min phal sak leh turin.

5. Mamit to Bairabi road siamthat a nih theih nan.