Aizawl July 24, 2024 : 23.7.2024 zingkarkhan Forest Training School ram huam chhunga Tennis Court leh gate te chu tihchhiat niin department phalna lova kawng laih a ni a, Environment, Forests & Climate Change (EF&CC) Department chuan thuchhuah a siam.

Bethlehem Vengthlang YMA President leh Local Council Chairman te chuan ni 5.7.2024 khan Principal, Forest Training School hnenah ziakin, Forest Training School Tennis Court paltlanga kawng awm sa chu tih zauh deuh a, laih tlang an tum thu leh an hmalaknaah harsatna siam lo turin FTS Principal chu an hriattir a ni.

Principal, FTS chuan Forest Training School compound chhungah kutthlak phal a nih loh thu leh phalna nei hmasa lo chuan kutthlak lo tura hriattirin, an thil duh chu dan ang taka kalpui anih theih nan an sawi anga ruahmanna awmsa a lo awm anih chuan a rang lama theh lut turin hriattina lehkha ni 11.7.2024 ah a tichhuak a, he lehkha hi Chairman, Local Council, Bethlehem Vengthlang leh President, YMA, Bethlehem Vengthlang te pek an ni.

Hetih mek lai hian, Principal, FTS hriattina chu ngai pawimawh lovin, ni 23.7.2024 zingkarah Gate leh Tennis Court fencing te tichhiain, kawng hi laih tan a ni.

EF&CC chuan hetianga dan lova Sawkar hmunhma tichhe zawnga Bethlehem Vengthlang mi thenkhatte hmalakna hi pawi a tiin a dem a. Sawrkar chuan helaia kawngpui sial chungchang hi a ngaituah mek a, mipuiten an mamawh dan te leh FTS ram neih dan te pawh a zir chiang mek a ni. Hetih laia thuneitu sorkar rawn hmasa lo a thil tichhe zawnga sawrkar ram chhunga chet lak hi khua leh tui thate tihdan turah an ngai lo a, hetiang thil hi thleng nawn tawh lo se a duh tih thuchhuah an siamah an tarlang.