Aizawl May 23, 2024 : Aizawl Traffic Police chuan kawngdunga lirthei dah hnawk, thenfai hna February atanga Special Drive an nei chuan rah tha a chhuah zel niin an sawi.

Aizawl traffic Police hotute chuan Bawngkawn leh Thuampui inkarte, Bawngkawn leh Chaltlang inkar te, Chanmari leh Chaltlang inkar leh Zarkawt leh Chanmari inkar kawngdunga chhun leh zan riaka lirthei dahte chu a neitute hnenah la sawn tura hriattir in, a dah luite chu an man zel a, heng kawngpui dungte hi a lo thawl zel nan, an vil zui reng a ni.

Heng veng te bakah hian Ramhlun Vengthar, Bungkawn Vengthar, Ngaizel leh Upper Republic chhung kawng dunga lirthei dah awm thin te pawh, Local Traffic Management Committee (LTMC) te nen thawk dunin thenfai hna an thawk a ni.

Heng an hmalakna te hian rah tha achhuah zel nia an hriat thu an sawi a, LTMC te pawhin an thlawp tha a, lirthei neitu- zingah pawh kawngsira dah ta lo, an awm teuh tih an sawi a, hetihlai hian dan pawisa loa kawngpui dung chu garage atan hmang chhunzawma, lirthei dah lui lehte pawh an awm thu leh chungte erawh an man zel a, special drive an kalpui chhung hian lirthei dah phallohna hmuna dah lui, lirthei za chuang fe an man tawh thu an sawi.

Traffic Police te hian kawngpui ti thawl a, traffic jam ti ziaawm turin beihpui an thlak zel dawn a, tuna an hmalak tawhna te pawh an vil zui zel dawn tih an sawi a, veng an la luh lohna hmunah te pawh kawngpuia lirthei dah avanga harsatna a awm a, report an dawn chuan bawhzui zel an tum thu sawiin, an hmalakna chu mipui tan ani a, khua leh tuite tawiawmna an mamawh hle tih an sawi bawk.