Kelkang kal tumna rilru put laiin II Chronicles 7:14 leh Jeremia 33:3 chhiar ngei a tha. Kelkang khi mahni sual zawng zawng sim duhna rilru nen thlarau thianghlim chhun khah theih ngei tura thinlung inhawng taka rilru ruak veka pan tur a ni. Tawngtaina hmun hrang hrang chanchin leh Bible chhiar tur. 1. Bethel Inpui: Gen 28:16-22 chhiar tur. Zing dar 10:30-ah Kelkang kohhran upa ten sermon sawiin tawngtaina hmun hrang hrang hman dan in hrilhfiahna hun an hmang thin. 2. Hmun thianghlim: Exodus 25:8 chhiar tur. Kan thinlung hi Pathian chenna tlak hmun thianghlima kan siam theih nan tawngtaiin kan dil ang. Kan sualna leh kan thlahtute sualna thlengin Pathian hnenah ngaihdam dila sual thupha chawiin kan tawngtai ang. Kan chhungkua leh kohhran Pathian chenna tlak hmun thianglim a nih theih nan kan dil ang. Kelkangah hian engvangin nge Lalpa min hruai thlen? tiin Pathian hnenah inthlahrung miah lovin zawh bawk tur. 3. Peniel: Genesis 32:22-32 Chhiar tur. Jakoba’n Pathian a buan khan Pathianin mal a sawm hma loh chuan a thlah duh lova, a vuan tlat a, nang pawh Jakoba angin i thil dil a pek hma loh che chuan Pathian vuan tlat la, tawngtai tlat ang che. Lalpa Kelkangah hian i thlarau thianghlim pawl tharna chan duhin ka kal a, I thlarauvin min chhung khat ngei ngei ang che. Pianthar ka duh. Lalpa hlawhchhamin min haw tir suh. Hlawhchham ka duhlo tiin ngenngawl takin tawngtai tlat tur. 4. Paradise: Luka 23:43. Chhiar tur. Isua ruala mi sual an khenbeh Isua ding lama mi khan a sualzia inhrechiangin, “Keini zawng hremzia reng kan ni, kan thiltih man chauh hmu kan ni, Isu I ram i thlen hunah min hre reng ang che,” inthlahrung takin a ti a, Thinlung taka mahni sual puang ri chuan Isua rilru a khawih chiang lutuk! “Vawiinah ka hnenah Paradise-ah i awm ve ang,” a ti nghal tawp mai a ni. Keini pawhin kan sualna hre rengin, “Isu Davida fapa min khawngaih la, i hnenah Paradise-ah min awm tir ve rawh,” tiin tihtak zetin tawngtai mai tur a ni. Chawl hahdam mai lovin. 5. Moria: Genesis 22:1-2 chhiar tur. Pathianin Abrahama a fiah a, a fapa neih chhun Isaka halral thil hlanah hlan turin a phut a, a hlan ang khan, “Lalpa keimahah hian engnge hlan tura min duh! Min hrilh rawh! Lalpa nangmah nena kan inpawlna daltu apiang chu ka halral vek ang. Engnge ka halral ang!” tiin Pathian hnenah tlawm tak leh inpekna tak tak nen bawkkhupa tawngtai tur. Abrahama’n a neih zawng zawng leh a thinlung a hlan ang khan i thinlung hlan ang che. 6. Gilead: Jeremia 8:20-22 chhiar tur. He hmunah hian damna dila tawngtai tur a ni. 7. Gethsemane: Matthaia 26:39 chhiar tur. Lal Isua’n “Keima thu ni lovin nangma thu thu ni zawk rawh se,” a tih ang chiah khan tawngtaina hmun hrang hranga Pathian hnena kan dil zawng zawng kha, “Lalpa ka dilna zawng zawngte kha keima thu ni lovin nangma thu thu ni zawk rawh se,” tia inngaitlawm taka bawkkhupa tawngtai tur a ni. Pathianin a chhang ngei ang che, Pathian chhanna i hre nghallo a nih pawhin beidawng suh i tawngtaina kha Pathianin a hre vek a, a chhang dawn che, rei deuh mahse nghak fan fan ang che, In i thlen hnuah pawh a chhanna i hre chauh thei! 8. Gilgal: Josua 5:2-9. 6:2, 16; I Samuela 11:14 chhiar tur. Gilgal hmuna Josua’n Israel fate serh a tan thar ang leh Pathian thu pek anga an hmelma Jeriko kulh vawi sarih an hel a an auh chim ang khan, Gilgal-ah hian vawi sarih kal kualin, “Hnehna chu Lalpa ta a ni,” tiin kan mihring hlui sualna hi auh chim tur a ni. Zam miah loh tur tuma’n min hmusit dawn lo tih hriat tur, Lalpa’n min hnehsak vek tawh. Kan mihring hlui sualna kan kalsan a ni tih entirnan hnehna kan puang anga, Josua’n Israel fate serh a tan thar ang khan kan piangthar a ni tih entirnan kan thinlung serh kan tan thar ang a, tlawmna entirnan inbingbilet hnuah inngaitlawm taka bawkkhupa tawngtai tur a ni. Tichuan sual sim piantharna diktak leh thlarau thianghlim pawl tharna nen hlim takin Kelkang hi kan chhuahsan anga, kan mihring hlui sualna erawh Kelkangah hian kan hnutchhiah anga, thlarau thianghlim meipuiin a lo kangral vek dawn a ni. Indona hi Lalpa indona a ni a, Hnehna chu Lalpa ta a ni si a.