Uttarakhand Chief Minister Pushkar Singh Dhami chuan Zirtawpni khan Joshimath khuaa cheng chhungkaw 600 vel chu an khua a pil mek avang leh an inte pawh a khik nasat tawh hlawm avangin rang taka inthiar chhuahna tur thupek a chhuah.

“Kan nunna a him hi a pawimawh ber. Thuneitute chu Joshimath-a cheng chhungkaw 600 velte chenna him lo chu hmun him danga sawn thuai tura thu pek an ni,” tiin Dhami hian thuneitu sang dangte nena he khaw chungchang sawia video conference an neih hnuah a sawi.

“Tuna hmalakna tur leh Joshimath hma hun zel tura tih turte pawh kan ruahman,” a ti a. Ruahmanna an neihte chu hma an lakpui nghal tih a sawi bawk.

Chief minister hian Inrinni khan Joshimath hi a tlawh nghal a, a mi chengte a kawm bakah thuneitute nen an thukhawm bawk.

Garhwal Commissioner Sushil Kumar leh Disaster Management Secretary Ranjit Kumar Sinha ten thil thleng vilin an thutchilh tih Dhami chuan a sawi bawk.

A chengte sawn chhuah hna chu a rang thei ang ber leh hmanhmawh taka kalpui turin thuneitute chu a hrilh tih a sawi.

Damdawi leh thlawhna hmanga mi thiar chuah dan tur engkim ruahman peih a ni tawh tih a sawi bawk.

Chief minister hian mi chengte hi Pipalkoti, Gauchar leh hmun dangah sawn lailawk an ni dawn tih a sawi.

State Disaster Response Force leh National Disaster Response Force mite pawh dah an ni a, a tula hman turin helicopter pawh inrintir a ni.