Khawpui chhunga veng hnuchhawn? Muanna Vengin bialtu tharah beiseina sang
Aizawl : India sorkar laipui pawhin theihtawpa mipui ten tui in tur thianghlim an neih theihna tura hma a lak mek laiin, Aizawl khawpui chhunga Muanna Veng chu tun thlengin tui connection a la thleng lo a, he veng hian tuikhur tui chu an mamawh phuhruk nan an hman a ngai a, an bialtu Chief Minister Zoramthanga chungah beiseina sang tak an neih thu ZALEN an hrilh.
Aizawl Municipal Council hnuaia hmar lama veng tawp ber Muanna Veng hi Mizoram buhfai mamawh tur an chhek khawlna Muanna Godown awmna niin, he veng-ah hian Mizoram pawn atanga khualzinte tlawh hlawh tak, Thutak Nunpuitu Team (TNT) hmunpui chu a awm a, chuti chungin he veng hi thui takin ngaihthah a ni a, tun thlengin tui connection mumal an la nei lo a, an veng panna kawngpui hi kum 20 dawn mumal enkawl a ni tawh lo bawk.
Muanna Veng hi 2004 khan Zuangtui atangin rorelna nei hranin an awm a, a mi cheng tam ber hi nitin eichawp dap niin, sawi tur ting chuang sorkar hnathawk chu an awm ve a, tui harsatna hi kumpui lingleta an buaina a ni. Hemi chungchangah hian an veng Local Council Treasurer, Shalom Phirthangi chuan, “Tui hi kan buiana ber pakhat a ni, connection kan neih loh hi thuhran chu ni se, tuikhur tha kan nei lo hi kan buaina a ni. Inhlawhfa chawp hi tam zawk kan ni a, tui mamawh khawp kan neih loh avangin, to ti chung chung pawhin kan lei a ngai thin,” a ti.
He vengah hian tuikhur chu pali ang chu a awm a, pakhat phei hi chu an veng mawng lam a mi a ni a, veng mipui tam zawk tan chhawr theih a ni lo. Kawng kamah tuikhur pahnih an nei a, pakhat hi PHE lamin tui pump atana an verh sak a ni a; mahse, pump hi a chhe tawh a; mahse, a pipe atang hian tui hi a hming chuan a haw ve reng thung. Tuikhur pakhat, Pu Sawma tuikhur an tih hi a chhak deuh hleka tuikhur, Pu Dara tuikhur atanga pipe hmanga an lak a ni a, thal lai chuan innghahna tlak a ni lo. Pu Dara tuikhur hi a nazawng tana pan rem chang lo tak a la ni zui bawk. Tuikhur tui te hi kawng dunga mi te chuan nawrlirh/tawlailir hmang ten an chawi tlangpui a, kawngpui dunga awm lote chuan kawngpui atang in chhipin an lak a ngai thin a ni.
Muanna Venga hmun tlawh hlawh tak TNT chuan an veng leh Zuangtui inrina kawr atangin tui hi an la ve bawk niin, an Local Council (LC) Treasurer hian a sawi a; mahse, in tur leh ei tur lam hi chu motor lianin an phur thin, thu sawiin, connection an neih theihna tur hian an veng LC pawh hi an nawr ve reng tih a sawi rualin, thuneitu lamah pawh an thlen thin nia a hriat thu a sawi bawk. An veng thenawm Zuangtui pawh hian tui connection hi an nei mumal lo a, kawngpui chhak lam hian connection hi an nei lo a, kawngpui thlang lamho chiah hian an nei.
Muanna veng tawpa awm, PHE department hmunah erawh hun rei tak atang khan tui hi an la thleng tawh thung a ni.
He veng hi an indan tirh sawrkar term hnih chu opposition MLA bial an ni a, hemi hnu hian rulling MLA hnuaiah term hnih an awm leh tawh a; mahse, hmasawnna hi an hmuh phah lem lo niin, LC lam hian an sawi a, CM bial an nih avanga hian beiseina erawh an nei sang tawh viau, tih ZALEN a hrilh. An veng kawngpui pawh hi Taxi driver leh tlawmngai pawlten an thawm that chu a tam zawk niin, a liantham erawh PWD lamin lei leh lung te hnawhin an siam ve thin thu a sawi lang tel bawk.
Ku
Kumm tin hian India ramah tui mamawh tawk hmuh loh vanga mi nuaih hnih chuang an thi ziah nia chhut a ni a, he rama mi maktaduai 600 chuangte hian tui thianghlim in tur an hmu lo niin chhut a ni.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024