Aizawl: Covid-19 vanga ram pawna awm tangkhang zinga haw duh te chu Resident Commisioner hnena inhriattir tura tih an ni a, tangkhang an tlem nia thudawn a ni.

Khawpui hrang hranga Mizoram House DRC te hnenah tunah hian Mizoram haw duh hming lakkhawm mek niin Delhi Mizoram House hnathawkte chuan an sawi a, RC hnenah hian a lutkhawm leh dawn a ni.

Zalen in India ram hmun hrang hranga Mizoram House thawktu te a biakna ah Mizoram pan theihloh vanga harsatna tawk an tlem tih an sawi a. New Delhi a Mizoram house thawktu te chuan damlo te nen chhiar tel vekin mi 20 vel House ah an khawsa mek niin an sawi a. House chu pawn lam atanga tlawhpawh phal a ni lo tih sawiin damlo, damdawiin pan ngai te chu Police te phone-in annin an hruai mai thin niin an sawi.

Kolkata ah chuan haw thei lo awm mahse an tam lo niin an sawi a. Tuna a awm te chu Mizoram house-ah an leng vek nia sawiin mi thenkhat chu anmahni duhthlanna in Mizo khualbuk ah te an insawn tih sawiin harsatna an nei lemlo tih an sawi. Thlawhna service chu hmundang aiin Mizoramah tihtawp hmasak ni mahse Mizorama haw tum te chu Silchar lamah an kal avangin a nawlpui chu an haw thei tih an sawi.

Guwahati ah chuan a nawlpui chu an haw nia an hriat thu sawiin tangkhang an nei lemlo nia an hriat thu an sawi a. Silchar Mizoram House thawktu te pawhin hmun danga harsatna tawk an hriatloh palh te an awm a nih loh chuan haw duh harsatna nei an hriat loh thu an sawi.

Shillong ah pawh YMA angin hma an la a, haw duh mahse harsatna nei an awm leh awm loh an inzawng tih sawiin tumah hetiang harsatna nei an hriat loh thu an sawi a.

Zirtawpni khan sawrkar motor in zirlai 4 te chu Vairengte thleng an dah tih sawiin tunah hian hrilenna hmun atanga lo haw zirlai pakhat chu an kawl mek nia sawiin ni 14 an kawl phawt hnuah chauh a chhuah an remti dawn niin Zalen an hrilh.