Economist Intelligence Unit (EIU) chuan kum tina a tih thin angin khawvela khawpui chen man to ber ber a tichhuak leh ta a, New York leh Singapore te chu khawpui chen hautakna ber an ni. Nikum khan Israel khawpui pakhat Tel Aviv chu pakhatna a ni a, kuminah erawh pathumnaah a tla thla a ni. 

Tun din hmunah New York leh Singapore te chu khawvela khawpui chen man to berna an ni a, New York tan chuan tun hi he dinhmun a luah vawi khatna a ni nghe nghe. Hong Kong leh Los Angeles te pawh khawpui chen hautakna zingah a langsar an ni. 
EIU survey atanga a lan dan chuan kumin chhunga khawpui hrang hranga chen man a san chhohna hi 8.1% a ni a, a chhan lian tak zingah Russia-in Ukraine a run leh Covid-19 vangte a ni. 

Heng hian supply chain nasa takin a nghawng a, thil man a san phah nasa hle bawk a ni. Hei hian khawpui tam tak a nghawng a, Istanbul-ah phei chuan kum hmasa aia a sanna chu 86% zet a ni. Buenos Aires (64%) leh Tehran (57%) ahte a ang hle bawk. 
Top 10-ah hian US khawpui zinga mi - New York, Los Angeles leh San Francisco te an lang a, hei hian US-ah pawh nghawng lian tak a nei tih a tarlang. US-ah bik hian kum 40 liam ta chhuga a san ber tum a thleng mek nia tarlan a ni cheu bawk. 

Zurich, Geneva, San Francisco, Paris, Sydney leh Copenhagen te chu khawvela khawpui chen man to zingah hian an tel. Hetih lai hian khawpui lian leh lar zinga mi Russia khawpui pahnih - Moscow leh St. Petersburg te chu 88-na leh 70-na an ni phak tawk a, an ramin Ukraine an run an tuar lutuk lo a ni mai thei. EIU hian khawpui 172 an zir chiang a, thil man san dan leh service hrang hrang man te an khaikhin a ni. 

Khawpui chen man tlawm 
Khawpui chen man to an thlan rual hian, chen hautak lohna khawpui pawh an thlang chhuak. Khawpui 172 an zir chian zingah hian Syria khawpui Damascus chu khawsak hautak lohna ber a ni. Damascus hi khawvela khawpui upa ber nia chhal a ni a, mihring maktaduai 2 vel an cheng a ni. Tripoli, Tehran, Tunis leh Tashkent te chu a mawng lama awm an ni a, India khawpui zinga mi - Ahmedabad, Chennai leh Bangalorete chu chen hautak lohna zingah hian a ;angsar pawl an ni bawk. 

Khawpui chen man to zual 10
1. New York
Singapore
3. Tel Aviv
4. Hong Kong
Los Angeles
6. Zurich
7. Geneva
8. San Francisco
9. Paris
10. Sydney
Copenhagen

Khawpui chen man tlawm zual 10
1. Damascus
2. Tripoli
3. Tehran
4. Tunis
5. Tashkent
6. Karachi
7. Almaty
8. Ahmedabad
9. Chennai
10. Algiers