Khawvel sava thlawk chak ber ber te hi ransa zinga tuan tha leh rang ber an ni tel bawk. A tlangpuiin heng sava thlawk chak te hi sa hel ei chi an nih deuh zel bawk vangin an ei rual ransa te tan chuan an hlauhawm tak zet. Thlai leh hnim hring ei chi nilo ransa te hi chu, an ransa pui dangte hmanga inhnawh puar thin an nih vangin mahni aia lian ransa koham rual zinga dam khawchhuak tur chuan chet ran leh inralrin reng a ngai bakah, ral laka bikbo thiam te chu pawimawhin a tangkai hle a ni.   

Sava thawk chak zual 5 te chu:

1. Peregrine falcon
Peregrine falcons te hi an sa eitur man tur hian van sang atangin chak takin an bir (dive) thin a, hetia an thlawh bir lai hi an thlawh chak ber lai a ni bawk. Peregrines te hian chaw atan sava dang an ring ber a, sava dangte aia sangah thlawkin an chhuk beih thin a, an chet ran leh thlawh chak em vang hian an man tumte chu awlsam takin an man mai thin. An man hnuah lei lamah an sa man chu an ei leh thin. 

Peregrine falcons te hi continent hrang hrangah hmuh tur an awm vek a, mah se an rem ve zel vangin khawvelah hmuh tur an tam tawh lo. Kum 20 bawr vel dam thleng thei anga chhut an ni a, an thlawh chak lai berin darkar khatah mel 240-a chakin an thlawk thei. 

2. Golden eagle

Mu pui kan tih mai, Golden eagle te hi Bald Eagle te nen intiat vela ngaih an ni a, pound 6-14 bawr vela rit an ni thei a, feet 3 laia sang te an ni thei bawk. Sihal leh kanghlai te hi chaw atan an ring deuh ber. Golden eagle te hian hmun sang lam atangin an sa vehte hi an bei thin a, chak taka birin an tin hriam takin an zu tham chat thin a ni. Chaw an zawnna kawngah hian an tin hriam leh an hmui zum tak chu an hmang tangkai thei em em bawk. 

Mu chi dangte ang bawkin Golden eagle te pawh hian mit fiah tha tak an nei a, an sa man tur zawng hian an lu hi degree 270-in an her kual thei a, chu chuan a pui nasa hle. Zan thimah chuan mihring te ang bawkin an mit hi hman tlak a ni bik lo. Darkar khatah mel 200 a chakin an thlawk thei. 

3. White-throated needletail swift

Mute chikhat White-throated needletail swifts te hian rannung te boruaka thlawk thinte an ei ber a, an thlawh chak avang hian an chaw tur hi chung lam leh sir lam atang pawhin harsa em em lovin an man thei mai thin. An taksa hi silaimu ang maia thawl zat mai a ni a, an thla a sei bawk a, an intha zo em em a ni. 

Heng sava te hian lung kua leh thing kuaah te bu an chhep mai thin. Sava pem chi niin Central Asia lamah an inthlah pung tlangpui a, thlasikah Southeast Asia, Indian subcontinent leh Australia lamah an pem kual thin. An thlawh chak zawng hi 106 mph a ni.

4. Mexican free-tailed bat

Mexican free-tailed bat te hi bak chikhat a ruala khawsa chi niin, hmun khatah maktaduai khat chuang te an fu khawm thin a, a chang phei chuan maktaduai 20 te an tling hial thin. A tlangpuiin zan lamah chaw zawngin an chhuak thin a, zan lama eng bawm thin rannung te ho an vai thin a ni. Free-tailed bat rual te zana chaw zawnga an han che tak tak chu zan khat ringawtah rannung ton 250 bawr vel te ei thin anga chhut a ni.

Mexican free-tailed bat te hi an thlawh chak em avang hian an mahni man tumtu raccoon, zawhte leh chhimbuk te lakah an him fo. An lian lo hle a, inches 3.5 bawr niin ounce khat pawh an tling mang lo a, kum 18 bawr an dam thei thung. Darkar khatah mel 100 a chakin an thlawk thei. 

5. Rock dove

Rock dove te hi parva chhungkaw zing ami an ni a, in lama parva/thuro kan hmuh thin pangai nen hian an danglam hran lo. 

Rock dove te hi a ruala khawsa thin niin 500 bawr vel te an awm khawm thin. Hnim leh sa an ei kawp thei a, rannung te an ei bakah hnim hnah, thei leh thlai mu te an ei thin. Khawpui chhehvela khawsa an nih chuan chawnawi leh thlai te pawh an ei mai thin. An thlawh chak zawng hi darkar khatah mel 93 te a ni.