ZALEN, Mar. 29, 2026: 1st Khelo India Tribal Games-ah Mizo ritchawi chakten mipa inelna bikah gold medal pathum telin a vaia medal sarih lain a pum puiah pahnihna an ni a. Hmeichhiaah gold medal pakhat an la bawk.

Chhatisgarh khawpui, Raipur-a a vawi khat nana Khelo India Tribal Games hi Ningani atanga tan kha niin Pathianni khan zawh fel a ni a. Mizoram atang hian football (mipa), hockey (hmeichhia), weightlifting leh wrestling-ah inelna hmachhawn a ni.

Ritchawi bikah hian Mizoram hian gold medal pali an la a, heng zinga pathum hi mipate lak niin hmeichhiaah Keitum nula, Khelo India State Centre of Excellence (KISCE), Salem Mualpui, Aizawla awm mek, Zosangzuali chuan +86kg huangah gold a la bawk.

Mipa zingah hian 60kg-ah Ramhlun Veng, Aizawl tlangval, National Centre of Excellence (NCOE), Manipur-a awm mek, Isac Malsawmtluanga; 71kg-ah Chhuarlung, Siaha tlangval, tuna Khelo India (KIC), Pune, Maharashtra-a awm mek, Silvan Beihrothathlo leh +110kg-ah Lawipu, Aizawl tlangval, NCOE, Imphal-a awm mek, David Zohmingmawia ten Mizoram tan gold an la.

Gold medal pathum bakah hian 110kg huangah David Lalzawmdika, Sialhawk, tuna NCOE, Imphal-a awm mek; 65kg huangah Laithanpuia, Sairang Dinthar veng, Mizoram State Sports Council (MSSC) Weighlifting Academy-a awm mek leh 79kg-ah Ainawn Veng, Aizawl tlangval, MSSC academy-a awm mek tho, Lalfakawma ten silver medal an la bawk.

Mizo tlangval ritchawi chakte hian gold leh silver medal pathum ve ve bakah KIC Pune-a awm lai, Aizawn Veng, Aizawl tlangval, Jacob Vanlaltluanga chuan 79kg-ah bronze medal a la bawk.

Tun tum intihsiaknaah hian Mizo ritchawi chak hmeichhia pangate huang pangaa inel tur leh mipa pariatte huang paruka inel turin an ka kal a. Coach Vanlalchhanhima Parte, PCA, Champhai Ruantlangin hovin manager Malsawma Khiangte, Sports & Youth Services (SYS) leh physiotherapist Angie Lalnunpuii, KISCE ten an kal bawk.