Khrismas thing phur ang aw, tui kan chawi hman leh kan chawi bawk ang a. Mission Veng bik saw chuan ka hriat theih tirh ata mi mal inah Khrismas hi kan thleng thin. Chutah chuan zaikhawm leh ruai theh engkim kan ti vek mai thin. November thla tawp lam emaw, December thla tantir lamah emaw Khrismas thing tuah tur kan phur thin. Val upain an ram vah pahin thing ro, Khrismas thinga phurh awm an lo en lawk thin a, chu chu a hun an tihah nula, tlangval leh naupang zawng zawng kan thawk chhuak a, nuam tak a ni ringawt mai.

Tum khat chu Phân lianpui mai tang nei mang lo hi kan kit a, a tangin min daih si lo a, upain, “Tlangval pakhat leh nula pakhat inkawp ula, vak darh mai rawh u,” min ti a.. tichuan, ka thianpa Rinthanga (Sapthlenga), Remveli (d/o Chuauthuama), Thanchhingi (d/o Zalawra) lei kei chu kan inkawp ta a. Vanneihthlak deuh maiin, hnahthap ro, kan pali phur tawk awm vel hi kan hmu hlauh mai a. Hnahthap thingte chu a deh a nuam si, keini ang takngial pawhin thing eh ka thiam ta emaw tih tur khawpin kan ek phel ve phawk phawk mai a nia, nuam hi kan ti laileng khawp a. Kha, khami kum khan keini pali thing phurh kha a tha ber ta awm nghe nghe asin maw le! Masi thlengtu ina kan han heuhpawhin kan meng sang khawp mai!

Tuichawi lam ve thung aw - Khrismas hnaih lam hian pa tlawmngai tuibel kan hawh khawm a, chu chu val upain tuichawi zan an rawt a. Chutah pawh chuan tlangval zawng zawng, nula zawng zawng, naupang zawng zawng hi kan thawk leh mai a, mipa naupangin meichher an ngaihtuah a, thenkhat phei chuan tute huan pal emawte kha an lo pawt rawlh a, kan te reru thin. Misiion Venglai chuan tuikhur (tui tui deuh bik) kan neih chu a hna a tlem em mai a, Sakhisih kan ti a, Dawrkai Veng nan kan inchawi tawm avangin kan chawi rual zan chuan a buaithlak deuh thin. Tin, Tlangbawk veng lamah lungkuang tuikhur kan ti bawk a, chu pawh chu December thla hi chuan a hna a tlem em em a. Tuikhur hna tam awm chhun chu Darnam kan tia; mahse, dar rim hi a nam deuh a, chham ek hi a tam a, thingpui pawh a hmel a mawi thei lo; mahse, tuihna a tam thung. Sakhishih leh Lungkuanga kan beidawn chuan Darnam chu kan chawi mai thin.

Tlangval laia Khrismas tui kang nghahte kha a nuam teh e... a kang lo ang tih a hlauhawm mah mah thin a nih kha. Hnahthel ro leh thingtang kan vawm khawm a, mahni ngaihzawngte nena tuikang han nghahho kha a inchhirawm loh thin. MAHSE, kei, hmel azawnga hmeichhe ber mai hi chuan MIN ngaizawngtu nei ve hek lo i... mi nuam tih angin ka ti ve lo.