June 15, 2022; Mizoram chhung leh rampawn hmun engemawzat-ah vawiin YMA day hlim taka hman a nih laiin, Haflong (Assam) ah chuan, ruahsur vanga khuarel chhiatna hrang hrang an tawh vangin an hmang ve thei lo a, hetihlai hian YMA day pualin, chief minister relief fund-ah an tihtheih ang tawk pawisa chhunluh erawh an tum.

Haflong (Assam) branch YMA vice president Lalnunmawia Hauhnar hnen atanga ZALEN thudawn danin, khuarel chhiatna an tawh mek vangin, YMA day lawmna programme dang an siam siam lo a, hnatlang nei tur erawhin ruahmanna an siam a, chupawh chu ruahsur/khawchhia vangin an nei thei ta lo. 

"Covid vanga YMA day hmang thei lo a kan awm hnuah, kumin chu hmang thei ngei turah kan inngai a, amaherawhchu, khuarel chhiatna hrang hrang vangin kan heti leh ta si a, a khawharthlak hle, ruahsur a tam em em reng avangin thenawm hnaivai te pawh intlawhpawh thei loin kan awm," thudawnna chuan a ti.  

Haflong (Assam) branch YMA hi kum 30 a upa a ni tawh a, tun dinhmunah member 100 chuang hret an awm. Kumdangah chuan hnatlangte, thisen pe te leh awmni khamin ruai nen te an lawm thin.

Thudawnna in a sawi danin, disaster manangement lam chuan tun June ni 18 thleng Haflong ah sikul chawlh an la puang a, Haflong - Silchar motor kawng pawh niminpiah (June ni 13) atang khan a ping leh tawh a, New Haflong rail station ah pawh tui a tling leh teuh tawh. Gauhati kawng inhawng zawkah pawh vawiin lam khan motor a tang leh nual tawh bawk.