North Korean hruaitu, Kim Jong-un-a farnu thiltithei tak chuan tun hania US-South Korean inremna siam chuan ‘thil hlauhawm zawk’ a thlen thei niin a sawi.

Kim Yo-jong-i chuan North Korea-in nuclear ralthuam a neihte chu he inremna hian ‘huang a zauhtir dawn’ tih a sawi niin an ram sorkar chanchinbu chuan a tar lang.

US hian tun hnaiah nuclear-a thuam tuihnuailawng chu South Korea-ah dahin Seoul pawhin a thenawmin nuclear ralthuam nena a rum thaih reng do let nan nuclear ralthuam hmansak a tum bawk.

South Korea hian ama puala nuclear ralthuam siam erawh a tum lem lo.

Inremna, Washington Declaration tia an sawi mai hi kar hmasa khan President Joe Biden-a leh talks with his South Korean President Yoon Suk-yeol te American khawpuia an inbiaknaah puan a ni.

Ram pahnihte inremna chungchang hi sawiin Kim-i chuan, “Hmelmaten nuclear-a indona tur an puahchaha Korean peninsula-a nuclear ralthuamte an chhawp a nih chuan, keimahni invenna turin an chet ang zelin kan che ve mai ang,” a ti.

Hetianga inremna leh inep tawnna boruak awm zui chuan ‘Asia hmarchhakah muanna leh himna a siam a, khawvel tan hlauhawm a chhek tam hlauh thung’ dawn niin a sawi.

Kim-i hi Workers’ Party of Korea-a Central Committee-ah chanvo sang tak changin a nutapa kal danah pawh thui tak hruaitu nia sawi a ni.

President Biden-a chuan South nena inremna an siam chu fakin an thawhpui ram tan North Korean lian zel tur danna a ni dawn tih a sawi.

President Yoon-a pawhin a beisei phak lohva US inpekna fakin an thawhpui ramin nuclear ralthuama beihna leh tihthaihna laka a hum dawn thu a sawi.

China erawh chuan US leh South Korea thawhhona tur hi a duh lo hle a, ‘boruak titangtu, hlauhawm siam theitu tur’ tiin a sawi.

Inremnaah hian US chuan nuclear-a thuam tuihnuailawng chu kum 40 hnua a vawi khat nan South Korea-ah a thawn dawn a, nuclear-a thuam bomber a chhawp tel ang.

Ram pahnih hian an hmalakna sawihona tur Nuclear Consultative Group an din bawk.

Tu nge Kim-i?

North Korean hruaitu thin, Kim Jong-il-a fa naupang ber, Kim Yo-jong-i hi a pian ni leh thla pawh chianga hriat a ni lo va.U.S. Treasury chuan September 26, 1989-a piang anga a chhinchhiah laiin South Korean-te chuan September 26, 1987-a piang angin an sawi ve thung.

Pyongyang khawpuia piang leh sei lian a ni a. A u mipa pahnihte nen kum 1996 leh December, 2000 inkar khan Bern, Switzerland-a Liebefeld-Steinhölzli public school-ah lehkha an zir thin a, hetah hian ‘Pak Mi-hyang’ tiin a hming a dah thin.

A u nen hian lehkha zir chhung zawng inzui an nih avangin an inngeih hle a, Pyongyang-a a kir hnuah Kim Il-sung University atangin computer science-ah degree a nei zui ta bawk.

Workers’ Party of Korea (WPK)-ah hian Publicity & Information Department-ah Deputy Department Director chanvo a chelh mek a. WPK-a Politburo-ah kum 2017 leh 2019 inkar tel tawhin 2020 leh 2021 chhung a tel leh a. September, 2021 atang khan State Affairs Commission of North Korea-ah member niin hmeichhe awm chhun a ni mek.

A u ang maia duh rum nia sawi a ni thin a, a chang phei chuan a u aia hrohrang a na zawk nia sawi pawh a ni a, khawthlang ram a ngaithei lo hle.