Kohhran hoten ruaitheh tualchhung kohhran kutah an dah

Admin - Nov 28, 2021

inkhawm programme erawh an siam hlawm hmel

Aizawl: Kumin Krismas leh Kumthar lawmna atana ruai theh leh theh loh chungchangah kohhran hruaituten thutlukna siam lovin tualchhung kohhran kutah an dah.

ZALEN in kohhran hrang hrang hruaitute a biakkualna ah ruai theh chungchang hi tualchhung kohhran kutah an dah tih an sawi vek a. Presbyterian Church of India a hotu luber Synod Moderator Rev. C.Lalhlira chuan ruai theh chungchangah Synod chuan thu leh hla neih a tum lo tih sawiin, "Ruai theh chungchang hi chu tualchhung kohhran kutah kan dah a, tun dinhmunah chuan ruai theh tum an awm rualin tum lo pawh an awm a ni," a ti a. Hetih rual hian Krismas ni takah erawh ruai hi theh loh nise tiin tualchhung kohhran te an hriattir tih sawiin inkhawm programme erawh an siam niin a sawi.

Baptist Church of Mizoram a AGS i/c Service Rev. R.Lalbiakliana pawhin ruai theh leh theh loh chungchangah engmah instruction siam lovin tualchhung kohhran kutah an dah tih a sawi bawk a. "Kan hriat theih chinah chuan ruai theh tum chu kan kohhran ah an la awm lova, hetih lai hian kohhran thenkhat chuan sa sem tum an awm a, la ngaihtuah chiah lo te pawh an awm niin kan hria," a ti bawk.

Salvation Army, Territorial Financial Secretary, India Eastern Territory Maj. K.Vanlalsawmthanga chuan ruai theh chungchang chu tualchhung thuneihna ah an dah tih a sawi bawk a. "Headquarter lam atang chuan 'theh rawh u' tih emaw 'theh suh u' tih emaw engmah kan nei lo a. Tualchhung thuneihna ah kan dah tawp mai a ni," a ti.

UPC of Mizoram hruaitu Rev. C.Lalremsanga pawhin headquarters atangin ruai theh chungchangah engmah thu leh hla an nei lemlo tih Zalen a hrilh a. "Ram pum ang chuan engmah ro kan neih ka ring lo a. Hmun thenkhatah hri ziaawm deuh an awm laiin ziaawm lo deuh an awm thei a, chuvangin inhrut-rual chi ah kan ngai lo a. Ruai theh chungchang chu tualchhung kohhran in an rel mai turah kan ngai," a ti bawk.

Seventh Day Adventist Executive Secretary Rev. Lalnilawma Colney chuan an kohhran chuan Krismas an la vak lo tih sawiin Krismas lawm leh ruai theh chungchang chu tualchhung thuneihna ah an dah niin a sawi bawk.

Share now