Aizawl July 4, 2023 : Mizoram Kohhran Hruaitute Committe te chuan vawiin khan Uniform Civil Code (UCC) hman tum thulh leh tura an duhna chu Member Secretary, Law Commission of India, 4th Floor, Lok Nayak Bhawan, Khan Market, New Delhi – 110003 hnenah a hnuai mi ang hian ngenna an thawn.

June 14, 2023-a Law Commission of India-in Public Notice a tihchhuah chungchangah, Mizoram Kohhran Hruaitute Committee chuan an thlirna atangin Mizoram bikah chuan thutlukna siamtu turah an inngaih thu leh Uniform Civil Code chu ngun taka an ngaihtuahin he Code kalpui tum chu titawp turin an ngen.

Mizoram bik chu Memorundum of Settlement (Peace Accord) angin India Parliament chu Mizo te nundan phung leh Sakhuanaah a inrawlh thian loh thu te, Mizo Costomary Law kalphung thlak danglam chungchangah te, Mizo Customary Law bikah hian thuneihna a a neih loh thu te, Mizoram chhunga In hmun leh ram inhlan chhawn leh neitu nihna chungchangah Mizoram Legislative thu tlukna a nih loh chuan Parliament thutlukna in a khawih thei lo a ni, an ti.

Hetiang hi thil nihphung a nih avang hian MKHC chuan UCC hi Mizoram-ah hman theih a ni lo tih chu an ngaihdan a ni a, Mizoram Assembly-in a a pawm chauh in hman theih a nih thu an tarlang.

MKHC chuan ngun taka a zirchianna atangin UCC hman a nih chuan hnam zia, sakhuana leh kan tih dan phung tam tak a ngawng dawn avangin India inpumkhatna tichhe thei-ah an ngai tih an tarlang

UCC hi hman a nih chuan Contitution Article 371 (G) hnuaia hnam tlem zawk ten dikna chanvo an neih te chu a titawp vek dawn a ni, an ti.

UCC hi hnam tlem zawk te leh sakhaw tlem zawk ram chhunga mi te nekchepna leh tih boral tumna hmanrua ni thei a ni a, hei vang hian Mizoram Church Leader's Committee (MKHC) te chuan Uniform Civil Code hman tum hi a dem tak zet a. Chuvangin UCC hman tumna hi hi an dem tak zet thu leh hman tumna chu ti tawp an duh thu an tarlang a ni.

Lehkha an thawnah hian Mizoram Kohhran Hruaitute Commitee aiawhin Rev. Dr. Chawnghmingliana, Chairman leh Lalnilawma Colney ten an hming an ziak.