Aizawl: I&PR Minister Lalruatkima chuan, "Kohhran leh khawtlang thiltihna ah tel chin tawk hriat a pawimawh a, kan zirlai nen insubuai lo turin mahni kan insiamrem a pawimawh a ni," a ti.

Tuichangral Zirlai Pawl ten nimin Central YMA Hall, Tuikhuahtlang a Freshers' Social leh zirlai titha lawmpuina hun an hmanah he thu hi sawiin I&PR Minister Lalruatkima chuan Tuichangral Zirlai Pawl ten an huamchhunga khaw hrang hrang te hmasawnna tur atana hna an thawh dan leh hma an lak dan te a hriatin lawmawm a tih thu a sawi a. Zirlai hlawhtlingte lawmpuina thu hlan in kum 10 ral leh hnua an thlen chin leh dinhmun beiseina sang tak nen thlir a ni dawn tih sawiin taimak leh tumruhna a pawimawh rualin mahni inthunun theih a pawimawh tih a sawi. Minister chuan, “Kan mi thiam hranghlui ten mual an liam zel a, an hnungzuitu thalai te a bikin All India Services leh Central Service ah direct a lut kan tlem tial tial hian tan kan lak nasat a tul zia a tilang a ni,” a ti a. “Ram leh hnam humhalh hi ruithle mai mai chunga tihhlawhtlin chi a ni lo a, thiamna leh finna nen rilru fim tak pu chunga tih a ngai a ni," a ti bawk.

Khual zahawm Project Director, DRDA, Serchhip H.Dolianbuaia pawhin zirlaite chu ruihtheih thil, zuk leh hmuam a fihlim turin a chah a. Eng hna pawh dik tak leh taima tak a thawk a, midang te entawn tlak khawpa mi rinawm ni tura fuihin, chumi hmang a zahawmna hlawh chhuak turin a fuih bawk.

Chawhnu lamah Career Awareness programme hman a ni a, Dr. Daniel Lalawmpuia leh Dr. Zonunmawia ten hun hmangin Zirlai pawl hrang hrang Mizo Zirlai Pawl, Mizo Students' Union, Shinlung Hill Students' Union leh Tuipuiral Zirlai Pawl aiawhten thusawina hun an hmang bawk.

Tuichangral Zirlai Pawl hi kum 2003 a din a ni a Tuichanglui rala khaw 14 - Bawktlang, Biate, Chekawn, East Lungdar, Hmunzawl, Khawlailung, Leng, Lungchhuan, Lung-kawlh, Mualcheng, North Vanlaiphai, Piler, Sailulak, Sialsir te a huam a ni.