Aizawl: Chanmari Branch YMA chuan thuchhuah siamin Zirtawpni kalta zan dar 11:30 vel khan Chanmari Presbyterian Kohhran Biak In bula wrong side-a tlan rawltharte leh Police two wheeler-a chuang intibuaite thelh tuma banphar, Lalsawmkima, Chanmari Branch YMA Executive Member ni lai, OB hlui leh Chanmari Presbyterian Kohhran Upa ni bawk chu Ramhlun South veng nia hriat Lalchhuanmawia (23) s/o Hmingthanvawra (L), Lalawmpuia (21) s/o Lalrinpuia, Lalsangliana (23) s/o M.C Thangpuia leh Biakthansanga (20) s/o Lalnunkima te chuan hnar ruhtliak khawpin na takin kut an thlak niin an sawi a.

He thil thleng vang hian nimin chhun dar 11:30 khan Chanmari Branch YMA Emergency Meeting an nei nghal tih sawiin YMA hruaitu leh Kohhran Upa meuh chunga kut thlaktute chungah hian danin dik taka a kawng a zawh theihna turin Aizawl Police Station-ah First Information Report (FIR) thehluh nise tia an rel angin FIR an thehlut ta niin an sawi.

Chanmari YMA chuan a huhoa kut inthlak ang chi chu thleng tawh lo se an duh tak zet tih sawiin Chanmari veng mi leh sa chunga kutthlakna hi tun hnuah a thleng leh a nih chuan Chanmari Veng mipuite chu a tul ang ang hmachhawn turin an inpeih niin an sawi bawk.