ZALEN, Apr. 17, 2025: Khawvel puma Kristiante ni pawimawh, mihringte chhandam tura krawsa Isua khen beha a awm leh a thawh lehna, Good Friday leh Easter Sunday chu Ningani zan atang khan khawvel hmun dangte rualin Mizorama kohhran hrang hrangten an hmang tan.

Good Friday hma ni zan hi khen beh a nih hmaa Isua man a nih champha a ni a. Hemi hun atang hian kohhran hote chuan hun an hmang tan hlawm.

Mizorama kohhran lian ber, Presbyterian Kohhran chuan Maundy Thursday tiin he zan hi an hmang a. Kohhran tam zawk chuan Lalpa Zanriah Sakramen an kil a, ‘Thihna khawp hiala lungngaihna Isuan a phur’ (Mat. 26:36-39) tih thupui an ngaithla bawk.

Mizoram Baptist Kohhran chuan Good Friday Eve tia hming vuahin hun an hmang a. Kohhran tam zawkin Lalpa Zanriah (Sacrament) an kil a, inkhawm banah inpawlho leh zaikhawmin hun an hmang bawk.

Catholic Kohhrante chuan Ningani Thianghlim tia hmangin Isuan a zirtirte nen zanriah hnuhnung an kilna chhui tharin Eucharist thianghlim buatsaih a nih bakah Isuan a zirtir angin Ke Sil Rawngbawlna neih a ni a. Puithiamten kohhran chhunga mi 12 thlante ke an silsak a, venpuina hun an hmang chhunzawm. 

Catholic kohhran hian Lent tia an sawi, Kristian ni pawimawh hi Ash Wednesday tiin Nilaini atang an hmang tan tawh a. Lal Isua thlalera ni 40 leh zan 40 tawngtaia hun a hmang angin mahni inserh nan ni 40 leh zan 40 chhung serhin Good Friday pawh hian chaw leh sa ngheiin an serh dawn a ni.

Mizoram UPC chuan he zan hi A Lungngai Zan tia hming vuahin hun an hmang a. Lalpa Zanriah Sakrament kil leh Ke Sil Rawngbawlnaa hun hmang an awm.

Zirtawpni hian kohhran hrang hrangte hian Good Friday an hmang dawn a. Presbyretian Kohhran chuan inkhawm vawi thumah thupui pathum - ‘Isua chunga rorelna’ (Mat. 26:65-68; Joh. 19:12-16), ‘Pathian kalsan nun’ (Mk. 15:33-39) leh ‘A thihna chu kan thihna’ (Is. 53:4-6; Rom 6:1-8; Gal. 2:20) an ngaithla ang.

Catholic Kohhrante chuan Good Friday hi Isuan Kalvari tlang pana kraws a putna leh a kawng zawh hriatreng nan ‘Kraws Kawng Zawhna Tawngtaina’ an nei ang a, biak inah Mass urhsun neih chhunzawmin kraws chawimawina leh thua rawngbawlna an nei zui ang.