Aizawl August 22, 2024 : Kolasib District Driver Welfare, Joint Action Committee, Kolasib District Truck Owners Association, Mizoram Truck Driver Association Sub hqrs Kolasib, Mizoram Tipper Assocation, Kolasib District leh Kawnpui Town Drivers Association ten a National Highway chhe siam that phut a vawiin dar 10 atanga Lirthei tlan lo tura an ngenna chuan zawm a hlawh hle a. Vawiin chhun lamah Lirthei bungraw phur chi veivak a awm lo.

Lirthei neitu pawl te hian vawiin atanga Lirthei tlan an remtih dawn loh thu an lo sawi tawh a. Vawiin dar 10 atang khan Kolasib bakah Vairengte, Bairabi leh Kawnpui ah te Duty an insiam a, Serkhan to Bagha Road lamah pawh Lirthei tlan a awm loh nan Lungdai ah duty a ni bawk a ni.

Kolasib DC Robert C. Lalhmangaiha chuan nizan khan Lirthei enkawltute hi DC Office, Kolasib-ah a kawm a, kawngpui tha nei tura hmalak mek a nih dante a hrilh a, Thawhtanni a NHIDCL leh Contractor te meeting a neihpui hnuah pawh hmalakna a awm chhoh mek thu sawiin, NHIDCL lamin an Contractor te ni 15 chhunga an kawng enkawl a khuar awm te hnawh vek tura an hriattir thute a hrilh a, hei vang hian hmalak chhung chu lo la ngaichang leh rih turin a ngen a. Mahse Lirthei enkawltute hian Lirthei kal tir lo tura hmalak an tum hi an kaltlangpui a ni.

Kolasib DC hian vawiin chhun khan Lirthei kaltir loh tuma pungkhawm Rengtekawn a mite a tlawh a. Hetah hian Lirthei dangtute chuan tuna an hmalakna chu Kawngpui siam tha nghal tura an beisei vang a nih loh thu an sawi a, "Tun ah hian Black Top nghal vek turin kan beisei a ni lo. Lirthei tlan nuam ve deuh tur tal pawhin kawng hi siam hmasa se tih hi kan duhdan a ni a. Hetiang a tlan nuam ve deuh tura an siam a nih chuan kan hmalakna hi kan chawlhsan thei reng," an ti.

Lirthei tlan tir lo tura hmalakna hi zawm a hlawh a, Dar 10 hma a Lirthei lo lut lakkawh hman tih loh chu Phai lam atang pawhin bungraw phur rawn lut an awm lo niin sawi a ni a. Lirthei rawn lut laklawh te pawh kawng lakah lo dan an nih avangin Rengtetlangsang lamah chuan Lirthei thahnem tak a tang tawh a ni.