Aizawl June 11, 2024 : Kolasib District chhunga Police Station hrang hrangte chuan kumin January thla atanga June ni 2 thleng khan MLP Act hnuaiah case 11 an ziaklut a, ND&PS Act hnuaiah Case 10 ziaklutin Kuhva chungchangah Case 20 an ziaklut tawh bawk.

David Lalthangliana, Superintendent of Police, Kolasib District ho a Kolasib Dist chhunga VDP tha te thilpek an hlanna hun a report a nih danin Kolasib Dist chhunga Police Station hrang hrang, Kolasib, Kawnpui, Bairabi leh Vairengte bakah Out Post hrang hrangten January atanga June ni 2 thleng a MLP Act hnuaia Zu an man hi Sapzu 2688.6 lits niin Rakzu 1950 lits bakah Beer 2139 Lits a ni a. Hemi kaihhnawiah hian mi 13 man an ni a, Lirthei 9 man in Case 11 an ziahluh zinga 8 ah hian Chargesheet siam a ni tawh a, Case chhui lai mek 3 an nei a. MLP Act kaihhnawih a an thil man hlut zawng hi Rs 32,20,832/- a ni.

January atanga June ni 2 thleng hian Kolasib Dist chhunga Police Station hrang hrangten ND&PS Act hnuaia thubuai an ziahluh hi Case 10 a ni a. Heng case 10 zinga case hnih hi tam tham deuh taka an man (Special Report Case) a ni a, case 8 dang hi tam lutuk lo an man (Non Special Report) a ni a. Heroin an man hi a vaiin 1061.71 Grams niin, hemi kaihhnawihah hian mi 13 an man tel a, Charge sheet an thehluh tawh hi Case 3 awmin an la chhuizui lai mek case 7 a awm a. Heroin an man hi Local rate hi Rs 31,84,320/- hu a ni.

Kolasib police te hian kumin ah Myanmar Kuhva ah Case 20 an ziaklut tawh a, Myanmar Kihva an man hi a vaiin Bag 3762 niin Kg 2,84,375 a ni a, Kuhva an man hlut zawng hi Rs 2,65,56,400/- man hu nia chhut a ni.