January 3, 2022; Krismas leh Kumthar ruaiah Kohhran hrang hrang ten sawrkarin a khap 'hman khat daih plastic' lam chi ruaithehna ah an hmang lo tlangpui nia thudawn a ni a.  January ni 2,2023 khan Mizoram hmun hrang hrangah Kumthar lawmna ruai theh a ni. Hmun thenkhatah chuan Kumthar lawmna ruai hi January ni 1, 2023 khan theh a ni thung a, ni 3 lama ruai nawn tur kohhran engemawzah an awm bawk. 

ZALEN a tarlan tawh angin, Aizawl Municipal Corporation (AMC) chuan Krismas leh Kumthar lawmna ruai buatsaihna atan hman khat daih plastic lam chi hmang lo turin kohhran tin te a lo ngen tawh a. He ngenna hi kohhran lam te'n an zawm tha tlangpui nia thudawn niin, ZALEN in a biak pawh theih chinah kuhva kawr atanga siamte, stainless steel thleng lei belh a thehte, fu atanga siam thleng tawihthei hmangte, lehkhaa siam thleng hmangte, thlangra a changel hnah phah a ruai theh pawh kohhran thahnem tak an awm a, thenkhat chuan sawrkarin a phal chin plastic (plate leh no) an hmang nia thudawn a ni.

"Tawihthei thleng leh no siamah hian kan entrepreneur (tharthilthlentu) te an tan hle a ngaiin ka hria a, mamawh zat ang lei tur a awm mai loa. Kumtluanin Kohhran hian thil tih a nei reng a, ni/hun bik pual thil tihkhawm a awm foa, thalai, kohhran hmeichhia, pavalai leh adt. nen khawmpui nei deuh reng kan nih avang hian hetah hian demand a awm nasa hle a, he mamawhna hmunruak awm hi chawm hneh tum hian chonaah lain theihtawp chhuah a tul a ni," tiin Kohhran Upa pakhat chuan ZALEN a hrilh bawk.

"Hnamdang ruai rawn theh kan nei nuala, kan Kohhran member aia tamin kan theh a ni.  Mizote'n Hunpui an hman dan chhim duh hi kan pung tual tual dawnin a lang a, khualzin rawn chhim duhte pawh kan tihthiam chuan an pung zel thei," tiin  Kohhran Upa  pakhat chuan a sawi bawk. "Ruai theh hi kan hnam tihphunga bet a nih tawh avangin hun rei tak chu kan la kalpui hmel a, mi zawng zawngin kan tih tawk theuh kan tih theihna Hunpui a nih avangin thiamthil (skill) zir belhna hun a nih bakah min phuarkhawmtu a nih avangin a pawimawhna hi kan inzirtir zel a tul a bawk ni," tiin ZALEN a hrilh bawk.

ZALEN in a hriat theih chinah, Aizawl khawpui chhunga Kohhran thenkhat Krimas leh Kumthar ruaitheh zat tarlan a ni a. Ruai theh zat hi chhiar dan erawh a inang loa, a tam zawk chuan a ni tlaia a theh zat chauh an chhiara, thenkhat chuan zing fatu theh zat, insenghawi thehzat leh a ni tlaia theh zat an belhkhawm thung a ni.

Mission Veng Presbyterian Kohhran
Krismas  - 3,758 Kumthar - 3,057

Khatla Veng Presbyterian Kohhran
Krismas  - 2,610 Kumthar - 2,689

Tuikual Presbyterian Kohhran
Krismas  -2,427 Kumthar - 2,610

Bethlehem Venglai Presbyterian Kohhran 
Krismas  - 3,066 Kumthar - 2,878

Bethlehem Vengthlang Presbyterian Kohhran
Krismas  - 1,700 Kumthar - 1,756

Chanmari Presbyterian Kohhran
Krismas  - 3,620 Kumthar - Thehlo

Electric Veng Prebyterian Kohhran
Krismas - 2,958 Kumthar 2,918

Salvation Temple Core
Krismas - 900 Kumthar 900

Durtlang Veng Prebyterian Kohhran
Krismas - 3,104 Kumthar 3,500

Kohhran Thianghlim chuan December 25 leh 26 khan Jerusalem Khawmpui Solomon's Temple ah an hmang a. Kumthar Ni ah inkhawmna veng tin leh khaw tina Kohhran ten an hmang thung.