Hmânah ‘bihchiangtu’ thianpa Zâra hian ‘Chawlhni sa bo thû’ a ziak tawh a; mahse, tûn tuma kan case erawh a inang hauh loh avângin; ziah pawh ka inthlahrung lêm lo e. Kan Krismas Arsa bawp leh a âwm-ti a bo ve tlat!

A bo chhanah thenawmpa, Pa Puia puh chî a ni ngawt lo. Ka nu’n Arsa a chhum hnû khan a rawn lêng lo hrim hrim! In hnuaipa Pa Hminga pawh chutiang tho; anni chuan Vawksâ an hmeh dâwn miau alâwm maw le. Arsa leh Vawksa an ‘cocktail’ ngai lo hrim hrim tih ka hria! Krismas tûkah Vawk kê fied leh a vun fried (VVF) an hmeh dâwn tih pawh ka hria. Puh tûr mi dang an vâng ngang mai!

Kumtluana chhûngkaw member 14-in kumtluana inhlawha kan intuak azârah Krismas sâ atân kan lo inkhâwl vê tâng tâng a. Krismas tûka hmeh atân, ‘Âr bawp chhawm’ Arsâ ka pa’n a lei ve tâwk tâwk a. Krismas tûka hmeh atâna kan tih Âr bawp leh a âwm-tî te chu kumtluana chawhmeh atân kan lo thlâkhlelh ve êm êm thin a nih avângin phûr takin chhûng inkhâwm kan hmang a. Minute khat leh tlêmah kan zo dêr! Chu pawh chu rei kan ti! Ar bawp leh a âwm-tî, ka nu’n thet a, a pawh darh sâ vek kan hmeh dâwn miau alâwm!

Chaw ei kan an siam a; ka u Number 8-na, ka u Châmi’n Antam-tlak tih loh bêl dang awm chhun, Arsa kanna bêl leh chî a rawn chhawp zo chiah chu, ârsa chhumna bêl chu a’n hawng chiaha le—a ke thiah, a ke rêk—a ‘ankle’, a ‘right’ kâwng, a left ‘ring’ (ka awih lo ê—‘left ring’ chu!), a vun hlang, a lu lawk zet… ‘hair cut’ sâ thlap, a chhuangtuar, a kezungpui… a tin tan loh lehnghal, a ‘right hand’… tih bâk a lo awm reng reng lo mai! A bawp leh a âwm-ti—ka nu’n a chhum hmin hnûa kan chhûngkaw member zawng zawng indaih tûra a theh sawm vek tawh chu a bo tlat mai!

Ka nu’n a chhum hmin vek tawh hnûah tunge kan chhûngkaw member zîngah a chhumna bêl khawih ta ang le—chu chu chhûngkaw court-ah case a tling pha lutuk! Kha arsa, ka nû chhum sâ kha ka zah ngawih ngawih kha a ni si a; a bo ta vek si!

Mahse, zânlai pelh dâwn thuaka zaikhâwm kan bân hnua in ka thlen chuan, ka nû Arsa chhum chu ka checked leh thlap a—a la kim vek. Ka chhûngte zawng zawng chu an lo mu vek tawh. A hnu lawkah ka pindan, kan ina pindan No. 9 ka pan a, ka mû. Puar lawihin a ni ka mut ni! Ka puar lawihna chhan chu—kan la sawi zêl ang…

A tûk, Krismas tûk chuan tumah kan tho tlai lo—Âr bawp leh a âwm-ti vângin. Kei ka tho tlai ber a. Zîng dâr 5 leh minute 47-ah chiah chiah min rawn kaitho ta luai luai mai a. Khua a la thim mup mai. Ka peih lo hle. Hmai ka phih zawhah chhûng inkhâwm meeting ka pa’n a ko ta dêr mai—kan vaiin chokâ leh thut pindanah kan thu thap tawh hlawm maw le! Hmâ tep tep tak kan ni—Âr bawp kan hmeh tûr effect vek! Chhûng inkhâwm pawh minute hnih chiah kan hmang—ka piana china ka pâ la tawngtai tawi ber tum, chhûng inkhâwm kan la hman rei lo ber tum a thleng—Âr bawp vâng!

Chaw an khawrh ta. Ka ûte ho ‘zawng zawng’ chuan phûr takin zîng dâr 6.16 leh second 3-a a pelhah tukthuan ei tûrin chaw ei dawhkân an peih thap tawh—phûr tak kan kîl thap tawh! Amaherawhchu, kei chu ka phûr ve tlat lo! Âr bawp leh a âwm-ti bo vâng khan—a bêlah hmu miau hek lo!

Ka pa a sa ta phat a. A ding hluai a. Ka nû hauh a tum ta mai!

“Khawnge a bawp leh a âwm-tî? Kumtluana kan chhûngkaw member zawng zawngina kan tuak ve tauh tauh, Krismas atâna kan khêk ve kha khaw’nge?” a ti ta tuar tuar mai. “Tuman châw kha bâr suh u … investigation kan tih a ngai. Ka CID dâwn!” tiin a âu ta tuar tuar mai—chû Krismas tûk, Âr bawp leh a âwm-ti kan hmeh dâwn tûk chuan!

“Chhûng inkhâwm neih that leh kan ngai,” a ti a. Thlêng min khuhtîr thap hlawm a. Kan hlau hlawm hlê … ti ila, keimah ber hian ka hlau lehzual! Nizan zanlaia thil thleng avâng khan … !

Thut khâwmna pindanah kan phei leh a. “In hria em? Âr bawk leh a âwm-ti hi engtin nge a bo theih? Nang Zira, tawngtai la, Pathian zâwt rawh,” tiin tawngtai tûrin min la ti zui!

Chham tûr hi ka’n hre lo khawp a maw! “Lalpa kan Krismas sâ, Âr bawp leh a âwm-tî a bo; min chhartîr leh rawh,” ka’n ti thâwr a. Chhar leh mah ila, ‘ka pumpuia mi hi’ a chhar theih tawh loh chiang tih ka hre ve kur tho si! “Lalpa, he Krismas nî taka ka chhûngte ka bum avângin Âr bawp leh a âwm-ti ka lo corrupt avângin min ngaidam ang che,” ka ti zui ta tawp mai. Chutah chuan ka pâ thinrim pawh a zal ta!

Mahse, ka chhûngkaw member zawng zawng, an vaia min melh dân erawh pangngai lo tak a ni—Âr bawp leh a âwm-ti ei châk vek tawh hek î! Mahse, nizâna ka lo ‘corruption’-na ka inpuan tâk avâng chuan ka thaw huai mai nia!

Hei hi ka sawi tel hrâm duh, a tâwp nân. Thil tihsual kan nei theuh fo ang; kan tihsual dân kawng leh kan tihsual dân erawh a inang vek lo ang. Mahse, ‘Ka tisual a ni,’ tih inpawm a, inpuang ngam apiang hi ‘mi huaisen’ an ni mai—he khawvêlah hian. Kan thil tihsual kan zêp rûkte hi hriat chhuah hun a awm nge nge thin. Kan nih ang ang, kan thil lo tihsual ang angte hian i lang chhuak ngam mai thin ang u.

Thil tisual thei lo mihring Pathianin a la siam lo—Evi leh Adam atang khan. ‘Ka nupui,’ pawh ti ngam loa Sari hi ‘Ka farnu a ni,’ ti tlattu Abrahama te, mi nû uirêtu Lal Davida te thleng pawn. Kan fihlim vek lo ang—rûl thlahho hi! Mahse, kan nihna ang hian i lang ngam mai ang u. Kan Âr bawp leh a âwm-ti bo kan sawi tâk ang khian inpuang ngam ve mai ila, kan buai tam hian ka ring lo thin!

Nang pawh i Ârsa bawp a bo ve mai thei; a âwm-tî nên pawn a bo kawp mai thei; mahse, ngaidam theitu ‘Kan Pâ, vâna mi,’ kan nei alâwm maw le!