December 1, 2022; Mizoram sawrkar a General Administration Department (GAD) chuan kumin krismas leh kumthar vuakvet-ah sawrkar laipui leh state dang VIP te Mizoram rawn zin lo tura ngenna a tichhuak a, sawrkar laipui leh state hrang hranga sawrkar hotute hnenah he ngenna hi thawn an ni.   

GAD a State Protocol Officer & Dy. Secretary to the Govt. of Mizoramin ngenna a tihchhuah ah kan hma lawk a krismas leh kumthar vuakvet lo awm turah, Mizoram sawrkar chuan December ni 15 atanga January ni 3, 2023 inkar chhungin ram pawn mikhual te a lo chhawn thei dawn lo tih tarlan niin, VIP leh khual pawimawh zawng zawng he hun inkar a lo zin tum te an zin hun sawn turin ngen an ni tih tarlan a ni bawk.

He ngenna tihchhuah hi sawrkar laipui a secretary zawng zawngte thawn vek an ni a, state leh UT a chief secretary te. Registrar, Supreme Court of India, New Delhi, Registrar, High Court of All States, state leh UT a secretary (Protocol) zawng zawng, Secretary, Lok Sabha Secretariat, New Delhi, Secretary, Scheduled Castes/Scheduled Tribes Commission, New Delhi, Secretary, Election Commission of India, New Delhi, Secretary, Other Backward Classes Commission, New Delhi, Secretary, NITI Ayog, New Delhi, Secretary, UPSC, New Delhi te bakah, state zawng zawng a ADC's to Governor te pek an ni.

He kalphung hi Mizoram sawrkarin tih dan phung a a lo nei tawh thin niin, ngenna a siam hnua programme rawn siam te chu ngenna thawn nawn thin an ni a, VIP lam pawhin sawrkar ngenna hi an zawm tha hle thin nia thudawn a ni.